ساجد قریشی کی شہادت کا غم آج بھی ہمارے دلوں میں تازہ ہے ، الطاف حسین

لندن۔۔۔22، اگست2013ء

متحدہ قومی موومنٹ کے قائد جناب الطاف حسین نے دہشت گردوں کے ہاتھوں شہید ہونے والے حق پرست رکن سندھ اسمبلی ساجد قریشی اور ان کے صاحبزادے وقاص قریشی کو زبردست خراج عقیدت پیش کیا ہے اورتمام ذمہ داروں وکارکنوں کو ہدایت کی ہے کہ ضمنی انتخابات میں تاریخ ساز کامیابی پرخوشیاں مناتے ہوئے حق پرست شہداء کے لواحقین کو ہرگز فراموش نہیں کریں۔ انہوں نے کہاکہ شہید ساجد قریشی ، تحریک کے ابتدائی دنوں سے ایم کیوایم سے وابستہ تھے اور ان کی شہادت کا غم آج بھی ہمارے دلوں میں تازہ ہے ۔ آج پی ایس 103 کے ضمنی انتخاب میں کامیابی کا جشن مناتے ہوئے ساجدقریشی شہید اور ان کے بیٹے وقاص قریشی شہید کی قربانیوں کو یادرکھنا اور ان کے اہل خانہ کے دکھ بانٹنا ہمارا فرض ہے ۔ جناب الطاف حسین نے نومنتخب نمائندوں کوہدایت کی کہ وہ شہید ساجد قریشی کے گھر جاکر ان کے اہل خانہ سے ملاقات کریں اور دیگر شہداء کے گھروں کا بھی دورہ کرکے لواحقین کی دلجوئی کریں۔