ملک بھرمیں ایم کیوایم کے یوم سوگ اورسندھ بھرمیں شٹرڈاؤن کی کال میں ایک دن کی توسیع

کراچی۔۔۔11، جنوری2015ء

متحدہ قومی موومنٹ کی رابطہ کمیٹی نے ماورائے عدالت قتل کیے گئے ایم کیوایم کے شہداء کے قاتلوں کی گرفتاری کیلئے سندھ حکومت کی جانب سے کسی قسم کی یقین دہانی نہ کرائے جانے پر کل بروز پیر کو بھی ملک بھرمیں یوم سوگ اور سندھ بھر میں شٹرڈاؤن کا اعلان کیاہے ۔ ایم کیوایم کے قائد جناب الطاف حسین نے رابطہ کمیٹی کے فیصلے کی توثیق کردی ہے۔واضح رہے کہ ہفتہ کی شب ایم کیوایم کے شہداء کے لواحقین نے وزیراعلیٰ ہاؤس سندھ کے سامنے احتجاجی دھرناشروع کیا تھا جو رات بھرجاری رہا۔ شہداء کے لواحقین اپنے پیاروں کے جنازوں کے ہمراہ 8 گھنٹے تک وزیراعلیٰ ہاؤس کے باہر احتجاج کرکے انصاف کی دہائیاں دیتے رہے لیکن وزیراعلیٰ سندھ اورسندھ کابینہ کے کسی بھی رکن نے شہداء کے لواحقین سے اظہاریکجہتی کرنے کی زحمت نہیں کی۔

اتوار کی صبح ایم کیوایم کی رابطہ کمیٹی کی جانب سے وزیراعلیٰ سندھ سید قائم علی شاہ کو 15 منٹ کی ڈیڈلائن دی گئی جس کااعلان ایم کیوایم کے قائد جناب الطاف حسین نے احتجاجی دھرنے کے شرکاء سے ٹیلی فون خطاب کے دوران کیا۔ایم کیوایم کی رابطہ کمیٹی کی جانب سے کہاگیا تھا کہ وزیراعلیٰ سندھ سید قائم علی شاہ 15 منٹ کے اندراندر وزیراعلیٰ ہاؤس سندھ کے باہر موجود شہداء کے لواحقین سے اظہارہمدردی کریں اورشہداء کے قاتلوں کی گرفتاری کی یقین دہانی کریں لیکن وزیراعلیٰ سندھ کی جانب سے اس ڈیڈلائن کابھی کوئی نوٹس نہیں لیاگیا۔ حکومت سندھ کی جانب سے مسلسل ہٹ دھرمی اورسردمہری کے رویے کے باعث ایم کیوایم نے ملک بھر میں یوم سوگ اور سندھ بھرمیں کاروبارزندگی بند رکھنے میں ایک دن کی توسیع کرنے کااعلان کردیا اوراب ایم کیوایم کے تحت ملک بھرمیں پرامن یوم سوگ اور سندھ بھرمیں شٹرڈاؤن کا سلسلہ پیرکے روزتک جاری رہے گا۔ ایم کیوایم کی رابطہ کمیٹی نے فیصلہ کیا ہے کہ اگر حکومت سندھ کی جانب سے پیرکے روزبھی ایم کیوایم کے پرامن احتجاج کا نوٹس نہ لیا گیا تو رابطہ کمیٹی اجلاس کرکے اپنے آئندہ کا لائحہ عمل کااعلان کرے گی ۔ رابطہ کمیٹی نے سندھ بھرکے تاجروں، صنعتکاروں،ٹرانسپورٹرز ،دکانداروں اور زندگی کے دیگر شعبوں سے تعلق رکھنے والے افراد سے اپیل کی کہ وہ پیرکے روزبھی اپنی تمام سرگرمیاں بند رکھ کراتحادویکجہتی کامظاہرہ کریں اور ایم کیوایم کے شہداء کے لواحقین کے غم میں شرکت کریں۔

دریں اثناء ایم کیوایم کے شہداء کے لواحقین کی جانب سے وزیراعلیٰ ہاؤس سندھ کے باہر احتجاجی دھرنا ختم کردیا گیا ،ایم کیوایم کے شہداء کی نماز جنازہ جناح گراؤنڈ میں ادا کرنے کی تیاریاں شروع کردی گئی ہیں اور نمازجنازہ کی ادائیگی کے بعد شہداء کوسپردخاک کیاجائے گا۔