متحدہ قومی موومنٹ کے زیراہتمام تھر کے قحط متاثرین میں طبی وغذائی سہولیات کی فراہمی اور امدادی سامان کی تقسیم کا سلسلہ پانچویں روز بھی جاری رہا

مٹھی ؍ تعلقہ چھاچھرو۔۔۔13، نومبر2014ء 

متحدہ قومی موومنٹ کے زیراہتمام تھر کے قحط متاثرین میں طبی وغذائی سہولیات کی فراہمی اور امدادی سامان کی تقسیم کا سلسلہ جمعرات کوپانچویں روز بھی جاری رہا ۔ طبی و امدادی سرگرمیوں کے پانچویں روز ایم کیوایم کے فلاحی ادارے خدمت خلق فاؤنڈیشن اور ایم کیوایم میڈیکل ایڈ کی جانب سے تعلقہ چھاچھرو یوسی کھیسر کے گاؤں کمبھڑ ہار میں طبی وامدادی کیمپ لگایا گیا جہاں صبح 9بجے سے شام گئے تک تھر متاثرین کو طی و امدادی سہولیات فراہم کی جاتی رہیں ۔ اس موقع پر ایم کیوایم میڈیکل ایڈ کمیٹی کے ڈاکٹروں اور پیرا میڈیکل اسٹاف کے اراکین نے قحط سالی سے متاثرہ تھر کے سینکڑوں نوجوانوں ، بزرگوں ، خواتین اور بچوں کاتفصیلی معائنہ کیا اور انہیں مفت ادویات فراہم کیں جبکہ کیمپ سے تھر متاثرین میں لاکھوں روپے مالیت پر مشتمل غذائی اجناس اور امدادی سامان بھی تقسیم کیا گیا ۔طبی و امدادی کیمپ پر حق پرست ارکان سندھ اسمبلی ڈاکٹر ظفر کمالی ، پونجو مل ، سندھ تنظیمی کمیٹی کے اراکین محمد یوسف ، شیراز مسعود ، رسول بخش میمن اور عمر کوٹ زونل کمیٹی کے اراکین بھی موجود تھے جو طبی و امدادی سرگرمیوں کی نگرانی کرتے رہے ۔ اس موقع پر انہوں نے تھرکے قحط سے متاثرہ نوجوانوں ،بزرگوں، خواتین اور بچوں کو جناب الطاف حسین کی جانب سے سلام پہنچایا اور کہا کہ تھر پارکر کے قحط سے متاثرہ افراد کیلئے جناب الطاف حسین نے ایم کیوایم اور خدمت خلق فاؤنڈیشن کو فعال کردیا ہے اور اب انشاء اللہ تھر کے عوام قحط سالی سے جلد نکل کر صحت مند زندگی گزاریں گے ۔ انہوں نے کہاکہ تھر میں برسوں سے قحط کی صورتحال پر حکومت سندھ اور اس کے وزراء کی کارکردگی مایوس کن ہے اور یہاں مجرمانہ غفلت کے وہ مظاہرے دیکھنے میں آئے ہیں جس پر ہر درد مند دل غمزدہ اور افسردہ ہوئے بغیر نہیں رہ سکتا 

دریں اثناء تھرپارکر کے قحط متاثرین کی امداد کیلئے مٹھی میں طبی وامدادی کیمپ آج پانچویں روز بھی جاری رہا جہاں اب تک مجموعی طور پر ہزاروں کی تعداد میں تھر متاثرین کو طبی و امدادی سہولیات فراہم کی جاچکی ہیں ۔ مٹھی کے طبی و امدادی کیمپ سے خدمت خلق فاؤنڈیشن کی ایمبولینس سروس نے دور دراز علاقوں میں پہنچ کر قحط متاثرین کو علاج و معالجہ کی سہولیات فراہم کیں اور انہیں وبائی امراض سے بچاؤ کی احتیاطی تدابیر سے بھی آگاہ کیا ۔ تھر کے قحط متاثرین نے طبی و امدادی سرگرمیوں کی مستقل فراہمی پر جناب الطاف حسین سے دلی تشکر کااظہار کرتے ہوئے کہاکہ اگر مٹھی اور دیگر علاقوں میں متحدہ قومی موومنٹ کی جانب طبی وا مدادی سرگرمیاں انجام نہیں دی جاتی تو یہاں ہونے والی اموات میں مزید اضافہ ہوتا ، ہم اللہ کے شکر گزار ہیں کہ اس نے تھر پاکر کے قحط سے متاثرہ افراد کیلئے کی بے لوث خدمت کیلئے جناب الطاف حسین کا انتخاب کیا ہے ۔ ان کا کہنا تھا کہ جناب الطاف حسین نے تھر میں قحط سالی کے خاتمہ کیلئے جو آواز اٹھائی ہے اس سے تھر کے عوام کو سکون میسر آیا ہے۔ اس موقع پر انہوں نے جناب الطاف حسین کی درازی عمر ، صحت وتندرستی اور ناگہانی آفات سے بچاؤ کیلئے دعائیں بھی کیں ۔