راولپنڈی میں فتح جنگ روڈ پر حساس ادارے کی گاڑی کو خود کش بمبار کے ذریعے نشانہ بنانے پر ایم کیوایم رابطہ کمیٹی کا اظہار مذمت

کراچی ۔۔۔4، جون 2014ء

متحدہ قومی موومنٹ کی رابطہ کمیٹی نے راولپنڈی میں فتح جنگ روڈ پر حساس ادارے کی گاڑی کو خود کش بمبار کے ذریعے نشانہ بنانے کی سخت ترین الفاظ میں مذمت کی ہے اور خود کش دھماکہ کے نتیجے میں متعدد افراد کے شہید اور زخمی ہونے پر گہرے دکھ اور افسوس کااظہا رکیا ہے ۔ ایک بیان میں رابطہ کمیٹی نے کہاکہ ملک کے حساس ادارے کی گاڑی کو خود کش بمبار کے ذریعے نشانہ بنانا ملک کی سالمیت پر حملے کے مترادف ہے اور اس میں ملوث سفاک دہشت گرد ملک و قوم کو عدم استحکام سے دوچار کرنے پر تلے ہوئے ہیں ۔ رابطہ کمیٹی نے خود کش بم دھماکہ کے نتیجے میں شہید افراد کے بلند درجات، لواحقین کیلئے صبر جمیل اور زخمیوں کی جلد ومکمل صحت یابی کیلئے دعا بھی کی ۔ رابطہ کمیٹی نے صدر مملکت ممنون حسین ، وزیراعظم نواز شریف اور وفاقی وزیر داخلہ چوہدری نثار علی خان سے مطالبہ کیا کہ راولپنڈی میں فتح جنگ روڈ پر حساس ادارے کی گاڑی کو خود کش بمبار کے ذریعے نشانہ بنانے میں ملوث سفاک دہشت گردوں کو فی الفور گرفتار کیاجائے، ملک سے دہشت گردی اور انتہاء پسندی کے خاتمے کیلئے ٹھو س نوعیت کے اقدامات کئے جائیں اور ملک و قوم کو جلد از جلد دہشت گردی کے عفریت سے نجات دلائی جائے۔