حق پرست رکن سندھ اسمبلی ساجد قریشی ، ان کے صاحبزادے وقاص قریشی کے سفاکانہ قتل کے خلاف کراچی سمیت سندھ بھر میں یوم سوگ منایا گیا ، ٹرانسپورٹ ، کاروباری سرگرمیاں مکمل معطل رہیں اور سڑکوں پر ہو کا عالم دکھائی دیا

کراچی ۔۔۔22، جون 2013ء 

مسلح دہشت گردوں کی فائرنگ سے ایم کیوایم کے حق پرست رکن سندھ اسمبلی ساجد قریشی ، ان کے صاحبزادے وقاص قریشی کی شہادت ، ایم کیوایم کے کارکنان کے سرکاری حراست میں ماورائے عدالت قتل ، انہیں گرفتار کرنے کے بعد لاپتہ کرنے اور تشدد کا نشانہ بنانے کے سنگین واقعات کے خلاف ہفتہ کو کراچی سمیت سندھ بھر میں پرامن یوم سوگ منایا گیااور ٹرانسپورٹ ، کاوربارِ زندگی مکمل طور پر معطل رہا اورسڑکوں پر ہو کا عالم دیکھائی دیا ۔ یوم سوگ کے موقع پر صوبہ سندھ ، پنجاب ، بلوچستان ، خیبر پختونخوا، گلگت بلتستان اور آزاد کشمیر میں ایم کیوایم کے دفاتر پر قرآن خوانی و فاتحہ خوانی کے اجتماعات منعقد ہوئے ، شہداء کو زبردست خراج عقید ت پیش کیا گیا دفاتر پر سیاہ پرچم لہرائے گئے اور مختلف شہروں کی چورنگی ، چوراہوں، کاروباری مراکز،شاہراوں اور دیگر مقامات پربینرز لگائے گئے جن پر شہداء کو زبردست خراجِ عقیدت کے کلمات اور سفاک قاتلوں کی گرفتاری کے مطالبات درج تھے ۔