انتہائی طاقت انسانوں کے ذہنوں کوکرپٹ بنادیتی ہے۔الطاف حسین
جہاں فرسودہ جاگیردارانہ نظام اور جاگیردارانہ ذہنیت ہوگی وہاں مذہبی انتہاء پسندی اور فرقہ واریت ہوگی
انگریزوں کی آمد کے بعد غیراعلانیہ طورپر ہندوؤں اورمسلمانوں کی جو تفریق شروع ہوئی وہ آج تک جاری ہے
ہندوستان میں انتہاپسندوں کے ہاتھوں مسلمانوں کے قتل پر غیرمسلم فنکار ، ادیب ، شاعراوردانشورمیدان میں آگئے جبکہ پاکستان میں مذہبی اقلیتوں کونشانہ بنانے کے خلاف کوئی باہرنہیں نکلا
جہاں فیوڈل سسٹم اورفیوڈل مائنڈسیٹ ہوتاہے وہاں اختیارات کونچلی سطح پرمنتقل نہیں کیاجاتا
عوام کی محرومی دورکرنے،اختیارات نچلی سطح پرمنتقل کرنے اور گڈگورننس کے لئے انتظامی بنیادوں پر یونٹس قائم کئے جائیں
کراچی وفاق کو67فیصدریونیودیتاہے لیکن کراچی کواس کی تعمیروترقی کے لئے جائزحصہ نہیں ملتا
میئراورڈپٹی میئر پانی اوربجلی کے بحران سے نمٹنے کے لئے کام کریں گے
سینئر سیاستداں محفوظ یارخان کی رہائش گاہ پر مختلف شعبہ ء زندگی سے تعلق رکھنے والے افرادکے اجتماع سے خطاب
لندن۔۔۔9، نومبر2015ء
متحدہ قومی موومنٹ کے قائدالطاف حسین نے کہاہے کہ انتہائی طاقت انسانوں کے ذہنوں کوکرپٹ بنادیتی ہے اورانتہائی طاقت رکھنے والے حکمراں اپنے آپ کوہی صحیح اورجائزسمجھتے ہیں۔ جہاں فرسودہ جاگیردارانہ نظام اور جاگیردارانہ ذہنیت ہوگی وہاں مذہبی انتہاء پسندی اور فرقہ واریت ہوگی ،وہاں نہ تو مخالف مذاہب ومسالک کے ماننے والوں کو برداشت کیاجائے گا اورنہ ہی انہیں برابری کی بنیاد پر عزت واحترام دیا جائے گا۔ان خیالات کا اظہار انہوں نے سینئر سیاستداں اورمعروف قانون داں ڈاکٹر محفوظ یارخان کی رہائش گاہ واقع ڈیفنس میں مختلف شعبہ ہائے زندگی سے تعلق رکھنے والے افرادکے ایک اجتماع سے ٹیلی فونک خطاب کرتے ہوئے کیا۔ اجلا س میں معروف صنعتکاروں، تاجروں ، ڈاکٹروں ، وکلاء، پروفیسرز اور مختلف تعلیمی اداروں کے طلباء نے شرکت کی ۔