بھتہ نہ دینے کی پاداش میں بلدیہ ٹاؤن کے اسکول پر دہشت گردوں کی جانب سے دستی بم سے حملے اور فائرنگ کے واقعہ پر الطاف حسین کا اظہار مذمت

لندن۔۔۔30، مارچ2013ء 

متحدہ قومی موومنٹ کے قائد جناب الطاف حسین نے جرائم پیشہ دہشت گردوں کی جانب سے بھتہ نہ دینے کی پاداش میں بلدیہ ٹاؤن میں واقع اسکول پر دستی بم سے حملے اور فائرنگ کی سخت ترین الفاظ میں مذمت کی ہے اور اس کے نتیجے میں اسکول کے پرنسپل کے شہید اور متعدد کم عمر طالب علموں کے زخمی ہونے پر گہرے دکھ اور افسوس کااظہار کیا ہے ۔ اپنے ایک مذمتی بیان انہوں نے کہاکہ جرائم پیشہ دہشت گردوں کا اسکول پر دستی بم سے حملہ اور فائرنگ کی کارروائی بزدلانہ اور انتہائی افسوسناک ہے اور اس بات کا ثبوت ہے کہ جرائم پیشہ دہشت گرد جہالت کے اندھیروں میں گم ہیں اور درسگاہوں کے تقدس اور احترام سے نابلد ہیں ۔ انہوں نے کہاکہ جس طریقے سے جرائم پیشہ دہشت گرد وں نے اپنی مذموم سرگرمیوں کیلئے اسکول پر دستی بم سے حملہ کیا اور پرنسپل سمیت معصوم طالب علموں کو نشانہ بنایا وہ انتہائی قابل مذمت ہے اور ہر علم دوست اور پرامن شہری کو اس بد ترین واقعہ پر آواز بلند کرنی چاہئے ۔انہوں نے اسکول پر دستی بم سے حملے اور فائرنگ کے نتیجے میں شہید پرنسپل کے بلند درجات اور زخمی طالب علموں کی جلد و مکمل صحت یابی کیلئے دعا بھی کی ۔ جناب الطاف حسین نے صدر مملکت آصف علی زرداری اور وزیر اعظم میر ہزار خان کھوسو سے مطالبہ کیا کہ بلدیہ ٹاؤن میں جرائم پیشہ دہشت گردوں کی جانب سے اسکول پر دستی بم سے حملے اور فائرنگ کا سنجیدگی سے نوٹس لیاجائے ، جرائم پیشہ دہشت گردوں کو لگام دی جائے اور انہیں گرفتار کرکے قرار واقعی سزا دی جائے ۔