نبیل گبول کی شمولیت سے ملک میں اتحاد واتفاق اور بھائی چارے کی فضاء کو فروغ ملے گا ،الطاف حسین

لندن۔۔۔17، مارچ2013ء

متحدہ قومی موومنٹ کے قائد جناب الطاف حسین نے لیاری سے سابق وفاقی وزیراورپیپلزپارٹی کے رہنما نبیل گبول اوران کے ہزاروں ساتھیوں کی ایم کیوایم میں شمولیت کازبردست خیرمقدم کرتے ہوئے انہیں متحدہ قومی موومنٹ میں خوش آمدید کہاہے۔ ایک بیان میں جناب الطاف حسین نے کہاکہ نبیل گبول ایک معزز سیاسی گھرانے سے تعلق رکھتے ہیں جو قیام پاکستان سے بھی پہلے کراچی میں قیام پذیر ہے اور جس کے افراد نے قیام پاکستان سے پہلے بھی کراچی سے انتخابات میں کامیابیاں حاصل کیں۔ جناب الطاف حسین نے امید ظاہر کی کہنبیل گبول کی ایم کیوایم میں شمولیت سے ملک میں اتحاد واتفاق اور بھائی چارے کی فضاء کو فروغ ملے گا ،ملک بالخصوص صوبہ سندھ میں مختلف لسانی اکائیوں کے درمیان اخوت ، محبت مں اضافہ ہوگا اورہم سب مل کر وطن عزیز کو ایک ایسی ریاست بنانے میں کامیاب ہونگے جو بانی پاکستان قائد اعظم محمد علی جناح کے وژن کے عین مطابق ہوگی۔ جناب الطاف حسین نے دیگر سیاسی جماعتوں سے تعلق رکھنے والے رہنماؤں کو بھی دعوت دی کہ وہ اپنی اپنی جماعتوں اور ایم کیوایم کے طرز عمل کا موازنہ کریں اور موازنہ کرنے کے بعد وہ بھی ایم کیوایم میں شامل ہوکر پاکستان کو ترقی یافتہ ، خوشحال اور آزادوخودمختار پاکستان بنانے میں ایم کیوایم سے تعاون کریں ۔جناب الطاف حسین نے نبیل گبول کے ساتھ ساتھ ایم کیوایم میں شمولیت اختیار کرن والے ان کے ہزاروں ساتھیوں کوبھی کھلے دل سے خوش آمدیدکہااور انہیں مبارکباد پیش کی۔