ایم کیو ایم کے سابق چیئرمین عظیم احمد طارق شہید کی 21ویں برسی انتہائی عقیدت و احترام سے لال قلعہ گراؤنڈ عزیزآباد میں منائی گئی

کراچی ۔۔۔ یکم مئی 2014ء 

متحدہ قومی موومنٹ کے زیر اہتمام ایم کیو ایم کے سابق چیئرمین عظیم احمد طارق شہید کی 21ویں برسی انتہائی عقیدت و احترام سے لال قلعہ گراؤنڈ عزیزآباد میں منائی گئی جس میں شہید عظیم احمد طارق سمیت تمام حق پرست شہداء کی ارواح کے ایصال ثواب کیلئے قرآن خوانی کی اور انہیں زبردست خراج عقیدت پیش کیا گیا ۔ 21ویں برسی کے اجتماع میں ایم کیو ایم رابطہ کمیٹی کے ڈپٹی کنوینرز ڈاکٹر خالد مقبول صدیقی ، انجینئر ناصر جمال ، اراکین رابطہ کمیٹی گلفراز خان خٹک ، کنور نوید جمیل ، خالد سلطان ، اسلم آفریدی ، کنور خالد یونس ، عادل خان ، ڈاکٹر صغیر احمد ، ایم کیو ایم کے مختلف ونگز و شعبہ جات کے اکان ، کراچی کے سیکٹرز و یونٹس کمیٹیوں کے ذمہ داران ، کارکنان اور ہمدردوں سمیت شہداء حق کے سوگوار لواحقین نے بڑی تعداد میں شرکت کی ۔ اس موقع پر مولانا مرتضیٰ رحمانی نے خشوع و خضوع کے ساتھ فاتحہ خوانی کرائی اور سابق چیئرمین عظیم احمد طارق شہید سمیت تمام حق پرست شہداء کی مغفرت ، ان کے درجات کی بلندی ، لواحقین کیلئے صبر جمیل ، ایم کیو ایم کے حق پرستانہ اور انقلابی مشن و مقصد کی کامیابی ، ایم کیو ایم کے خلاف سازشوں کے خاتمے اور قائد تحریک جناب الطاف حسین کی درازی عمر اور صحت و تندرستی کیلئے خصوصی دعائیں کی گئیں۔