ایم کیوایم رابطہ کمیٹی کا پشاور میں حالیہ زلزلے کے باعث لوگوں کے مالی نقصانات اور 7 افراد کے زخمی ہونے پر اظہار افسوس

کراچی ۔۔۔ 10؍ اپریل 2016ء 

متحدہ قومی موومنٹ کی رابطہ کمیٹی نے پشاور میں زلزلے کے باعث لوگوں کے جانی و مالی نقصان پر گہرے دکھ اور افسوس کااظہار کیا ہے۔ ایک بیان میں رابطہ کمیٹی نے کہاکہ زلزلے کے سبب پشاور میں 7 افراد زخمی ہوگئے جبکہ کئی متعدد گھر منہدم ہونے کی وجہ سے کئی خاندان کھلے آسمان تلے زندگی گزارنے پر مجبو ہیں۔ رابطہ کمیٹی نے کہا کہ حالیہ موسمیاتی تبدیلیوں کے باعث ملک بھر میں شدید بارشوں اور زلزلوں سے مسلسل جانی و مالی نقصانات ہورہے ہیں جن کا فی الفور سدباب کرکے عوام کے جان و مال کو تحفظ فراہم کرنا حکومت کی بنیادی ذمہ داری ہے۔ رابطہ کمیٹی نے کہاکہ پشاور میں بھی حالیہ زلزلے سے کئی لوگ کے کاروبار تباہ ہوگئے اور متعدد بیروزگار ہوگئے ہیں۔ انہوں نے کہا کہ زلزلہ متاثرین کے نقصانات کا ازالہ کرنا اور انہیں دوبارہ زندگی کی خوشیاں لوٹانا حکومتی فرائض کا حصہ ہے۔ رابطہ کمیٹی نے زلزلے میں زخمی ہونے والے افراد سے دلی ہمدردی کااظہار اور ان کی جلد ومکمل صحت یابی کیلئے دعا کی جبکہ رابطہ کمیٹی نے حکومت سے مطالبہ کیا کہ مستقبل میں زلزلہ سے ہونے والی تباہ کاریوں سے تحفظ کیلئے نیشنل ڈیزاسٹر مینجمنٹ سیل کو بھرپور انداز میں فعال کیاجائے تاکہ زلزلہ سمیت قدرتی آفات سے قبل ہنگامی صورتحال نافذ کرکے جانی و مالی نقصانات کے احتمال کو کم کیاجاسکے ۔