گوجرانوالہ میں مسلم لیگ ن اورتحریک انصاف کی ریلیوں میں جدید اسلحہ کا استعمال حکومت اورقانون نافذ کرنے والے اداروں کے لئے لمحہ فکریہ ہے۔ رابطہ کمیٹی ایم کیوایم

کراچی ۔۔۔ 20 جون 2015ء

متحدہ قومی موومنٹ کی رابطہ کمیٹی نے پنجاب کے شہرگوجرانوالہ میں ضمنی انتخاب کے دوران حکمراں جماعت مسلم لیگ ن کی ریلی میں جدیدوخودکاراسلحہ کی نمائش اورآپس میں ہونے والے مسلح تصادم پرتبصرہ کرتے ہوئے کہاہے کہ دوروزقبل گوجرانوالہ میں تحریک انصاف کے جلسہ میں جدیداسلحہ کی نمائش کی گئی اور گزشتہ روزمسلم لیگ ن کی ریلی میں جدیداسلحہ کا استعمال کیاگیا۔رابطہ کمیٹی نے کہاکہ دن رات کراچی میں اسلحہ کی بھرمار کی رٹ لگانے والے اورکراچی میں اسلحہ کی بازیابی کیلئے بڑے پیمانے پر آپریشن کاشورمچانے والے عناصر گوجرانوالہ میں مسلم لیگ ن اورتحریک انصاف کی جانب سے جلسوں اورریلی میں اسلحہ کی نمائش پر کیوں خاموش ہیں؟رابطہ کمیٹی نے کہاکہ گوجرانوالہ میں مسلم لیگ ن اورتحریک انصاف کی ریلیوں میں جدید اسلحہ کے استعمال سے ایک بارپھر ثابت ہوگیاہے کہ عسکری ونگ ایم کیوایم میں نہیں بلکہ ان سیاسی جماعتوں نے بنارکھے ہیں۔ رابطہ کمیٹی نے کہاکہ پولیس رینجرز کراچی میں تواسلحہ کی تلاشی کے نام پر گھرگھرچھاپے مار رہی ہے، گھروں، پارکوں کو کھوداجارہاہے لیکن انہیں گوجرانوالہ اورپنجاب کے دیگرشہروں میں اسلحہ کی نمائش اوراسلحہ کاآزادانہ استعمال نظرکیوں نہیں آرہاہے؟آخروفاقی اورصوبائی حکومت کویہ اسلحہ نظرکیوں نہیں آتا؟کراچی میں اسلحہ کی بازیابی کے نام پر ہرعلاقے میں تلاشی اورپنجاب میں اسلحہ کے کھلے استعمال پر خاموشی کیوں ہے؟رابطہ کمیٹی نے کہاکہ پورے ملک اسلحہ کابیدریغ استعمال ہوتاہے ، اسلحہ بنانے کی فیکٹریاں کراچی سے باہر ہیں ، اسلحہ ملک کے دوسرے صوبوں سے اسمگل ہوکرکراچی آتاہے لیکن اسلحہ بنانے اوراسمگل کرنے کے ذمہ داروں کے خلاف آپریشن کرنے کے بجائے اسلحہ کے خاتمہ کے نام پر آپریشن صرف کراچی میں کیاجارہاہے۔رابطہ کمیٹی نے کہاکہ جب تک قانون کادہرامعیاررہے گا اورہرحکومتی اقدام تعصب کی بنیادپر کیا جائے گااس وقت تک ملک میں امن قائم نہیں ہوسکتا۔