میں فیلڈمارشل عاصم منیراورسندھ کے کورکمانڈراورمتعلقہ حکام سے اپیل کرتاہوں کہ ایم کیوایم کی کوآرڈی نیشن کمیٹی کے ارکان نثارپہنور اورانورخان ترین کوبازیاب کرائیں۔
نثارپہنور اورانورخان ترین کو16ستمبر 2025ء کوایک تقریب میں شرکت کے لئے جاتے ہوئے نامعلوم افراد نے اغواکرکے لاپتہ کردیا ہے۔ انہیں لاپتہ ہوئے ایک مہینہ سے زیادہ کاعرصہ گزرچکا ہے ۔ نثارپہنورکو اس سے پہلے بھی تین مرتبہ گرفتار کیا گیا تھا اوراب انہیں چوتھی مرتبہ لاپتہ کیا گیا ہے۔ اسی طرح انورترین کودوسری مرتبہ حراست میں لیا گیا ہے۔ نثارپہنور اورانورخان ترین کی جبری گمشدگی کے خلاف ان کے اہل خانہ نے سندھ ہائیکورٹ میں پٹیشن بھی دائر کی لیکن کورٹ نے پٹیشن کی سماعت کے لئے ایک مہینہ بعد کی تاریخ مقرر کی ہے ۔ ہم نے انسانی حقوق کمیشن آف پاکستان سمیت تمام اداروں کو بھی آگاہ کیا۔ یہ بڑی بدقسمتی ہے کہ ملک میں بے گناہ افراد کوپکڑ کرلاپتہ کیا جارہا ہے، حالانکہ ایم کیوایم ہی نہیں بلکہ کسی بھی سیاسی جماعت کے کارکن کوگرفتارکرکے لاپتہ کرنا سراسرغیرقانونی عمل ہے جو ہرگز نہیں ہونا چاہیے۔ فیلڈمارشل عاصم منیراورسندھ کے کورکمانڈراورمتعلقہ حکام زرا تصورکریں کہ اگرکسی کا بیٹا یا بھائی یاشوہر اس طرح لاپتہ کردیا جائے تواس کے اہل خانہ کے دلوں پر کیا گزرتی ہوگی ۔ان دونوں کے اہل خانہ بہت ذہنی اذیت میں مبتلا ہیں لہٰذا میری آپ سے پرذور اپیل ہے کہ نثارپہنور اورانورترین کوفی الفوربازیاب کرائیں۔
الطاف حسین
فکری نشست نمبر 331 سے خطاب
16اکتوبر 2025ئ