پیپلزپارٹی کی صوبائی اور بلدیاتی حکومت نے کراچی کے شہریوں کو بنیادی سہولیات سے محروم کررکھاہے، ایم کیوایم رابطہ کمیٹی
سڑکوں کی زبوں حالی کے باعث ٹریفک حادثات میں ہرگزرتے دن کے ساتھ اضافہ دیکھنے میں آرہا ہے
لندن۔۔۔2، نومبر2024ئ
متحدہ قومی موومنٹ کی رابطہ کمیٹی نے کراچی میں ٹریفک حادثات میں بے گناہ شہریوں کی ہلاکتوں کے واقعات پر گہرے دکھ اور افسوس کااظہارکرتے ہوئے کہاہے کہ پیپلزپارٹی کی صوبائی اور بلدیاتی حکومت نے کراچی کے شہریوں کو بنیادی سہولیات سے محروم کررکھاہے ۔
ایم کیوایم انٹرنیشنل سیکریٹریٹ لندن سے جاری ایک بیان میں رابطہ کمیٹی نے کہاکہ کراچی قومی خزانے میں سب سے زیادہ ریونیو جمع کراتا ہے اس کے باوجود کراچی کے عوام پانی ،بجلی ، گیس اور ٹرانسپورٹ کی سہولیات سے محروم ہیں ، کراچی کی ہرسڑک ٹوٹ پھوٹ کا شکارہے اور سڑکوں کی تعمیرومرمت میں بلدیاتی حکومت کی جانب سے مجرمانہ غفلت کامظاہرہ کیاجارہا ہے ۔ رابطہ کمیٹی نے کہاکہ ایک جانب سڑکوںکی زبوں حالی کے باعث ٹریفک حادثات میں ہرگزرتے دن کے ساتھ اضافہ دیکھنے میں آرہا ہے جبکہ دوسری جانب دن کے اوقات میں ہیوی ٹریفک کی آمدورفت کے باعث موٹرسائیکل سوارحادثات کا شکارہورہے ہیں اور متعدد شہری اپنی جان سے ہاتھ دھوبیٹھے ہیں ۔
رابطہ کمیٹی نے کہاکہ ایسا محسوس ہوتا ہے کہ پیپلزپارٹی کی نسل پرست حکومت کراچی کے شہریوں سے انتقام لے رہی ہے اور شہریوں کو بنیادی سہولیت سے محروم کرنے روایتی تعصب اورعصبیت کامظاہرہ کررہی ہے جس کی جتنی بھی مذمت کی جائے کم ہے ۔
رابطہ کمیٹی نے مطالبہ کیاکہ کراچی کے شہریوں کوہنگامی بنیادیوں پرپانی ، بجلی ، گیس اورٹرانسپورٹ کی سہولیات فراہم کی جائیں اورٹریفک حادثات کی روک تھا م کیلئے ٹھوس اور مثبت اقدامات بروئے کار لائے جائیں۔ رابطہ کمیٹی نے ٹریفک حادثات میں جاں بحق ہونے والے افراد کے سوگوارلواحقین سے دلی تعزیت اورہمدردی کابھی اظہارکیا۔
٭٭٭٭٭