سندھی قوم پرستوں کے سندھ کی اُردو بولنے والی آبادیوں کے متعلق دھمکی آمیز بیانات شرمناک وقابل مذمت ہیں ، انچارج متحدہ سوشل فورم

کراچی ۔۔۔15ستمبر 2014ء

متحدہ سوشل فورم کے انچارج لونگ خان چنا نے سندھی قوم پرستوں کی جانب سے سندھ کی اُردو بولنے والی آبادیوں کے متعلق دھمکی آمیز بیانات کو شرمناک قرار دیتے ہوئے ان کی سخت الفاظ میں مذمت کی ہے ۔ایک بیان میں انہوں نے کہا کہ سندھ دھرتی پر یہاں بسنے والے تمام مستقل باسیوں کا مساوی حق ہے اور یہ دھرتی کسی واحدگروہ یا گروپ کی جاگیر نہیں ہے۔ انہوں نے کہا کہ گزشتہ دہائیوں سے سندھ میں بسنے والے قوم پرست عناصر سندھ دھرتی کے مفاد کے خلاف اپنے آقاؤں کی خوشنودی کے لئے عوام کے درمیان اختلافات او ر نفرت پھیلانے کے لئے مختلف ہتھکنڈے اختیار کرتے آرہے ہیں تاکہ سندھ کے مستقل باشندے آپس میں دست و گریباں رہیں اور صوبہ سندھ ترقی کرنے کے بجائے پستی کا شکار ہو جائے اور یہی وجہ ہے کہ ان قوم پرستوں کے اُوچھے ہتھکنڈوں سے سندھ دھرتی کو ناقابل تلافی نقصان پہنچا ہے ۔ انہوں نے سندھ کے مستقل باشندوں کو یکجا کرنے کے لئے ایم کیو ایم کے قائد جناب الطاف حسین کی کاوشوں کو خراج تحسین پیش کرتے ہوئے کہاکہ الطاف حسین نے اپنی جدو جہد کے آغاز سے سندھ میں بسنے والے اُردو بولنے والے اور سندھی بولنے والے عوام کو یکجا کر کے سندھ دھرتی کو مضبوط کرنے اور جوڑنے کی کوششیں کی ہیں لیکن قوم پرستوں نے ہمیشہ عوام میں نفرتوں کے بیج بونے کی سازشیں کی ہیں۔ لونگ خان چنا نے سندھ کے محب وطن دانشوروں ، قلمکاروں ، لکھاریوں ، صحافیوں سے اپیل کی کہ وہ سندھ کے عوام کو حقائق سے آگہی فراہم کرنے میں اپنا اہم کردار ادا کریں اور آپس میں تفرکا پیدا کرنے والے عناصر کے خلاف آواز حق بلند کریں ۔