اسلام آبادمیں تحریک انصاف کے کارکنوں کی جانب سے ٹی وی چینلز کے صحافی ،کیمرہ مینوں اورپولیس پر حملے اورتشد دقابل مذمت ہے، میاں عتیق ،رکن رابطہ کمیٹی ایم کیوایم
پولیس اورصحافیوں پر حملے عمران خان کی جانب سے کارکنوں کو تشددکی کھلے عام ترغیب دینے کانتیجہ ہے
اس قسم کی پرتشددکارروائیاں امن پسندی کے تمام دعووں کی کھلی نفی ہیں ۔میاں عتیق
پی ٹی آئی کی قیادت کواپنے کارکنوں کوتشددکی ترغیب دینے کے بجائے امن پسندی کی تعلیم دینی چاہیے
اسلام آباد۔۔۔14 ستمبر2014ء
متحدہ قومی موومنٹ کی رابطہ کمیٹی کے رکن میاں عتیق نے اسلام آبادمیں دھرنے میں موجود تحریک انصاف کے کارکنوں کی جانب سے پولیس اہلکاروں اور ایک ٹی وی کے صحافی اورکیمرہ مینوں پر حملے اورتشددکی شدیدمذمت کی ہے ۔ اپنے ایک بیان میں میاں عتیق نے کہاکہ پی ٹی آئی کے سربراہ عمران خان کی جانب سے اپنے کارکنوں کوپولیس پرحملوں اورٹی وی چینلزاورصحافیوں کے خلاف تشددکی جس طرح کھلے عام ترغیب دی جارہی ہے یہ اسی کانتیجہ ہے کہ ہفتہ کے روز بھی تحریک انصاف کے کارکنوں نے ایک ٹی وی کی عمارت پر حملہ کیاتھااورآج بھی ایک اورٹی وی چینلز کی نیوزٹیم پر حملہ کیاگیا، صحافیوں کوماراپیٹاگیا اور کیمرہ توڑدیاگیا۔آج بھی پی ٹی آئی کے کارکنوں نے اسلام آبادمیں پولیس اہلکاروں پر حملہ کیااورانہیں تشددکانشانہ بنایا۔ میاں عتیق نے کہاکہ پی ٹی آئی کے کارکنوں کی جانب سے تشددکی یہ کارروائیاں قابل مذمت ہیں، اس قسم کی پرتشددکارروائیاں امن پسندی کے تمام دعووں کی کھلی نفی ہیں ۔میاں عتیق نے کہا کہ پی ٹی آئی کی قیادت کواپنے کارکنوں کوتشددکی ترغیب دینے کے بجائے امن پسندی کی تعلیم دینی چاہیے اوراپنے کارکنوں کوہرقسم کے تشددسے روکنا چاہیے ۔