ایم کیوایم رابطہ کمیٹی کے ارکان کی مولانامفتی محمدنعیم سے ملاقات
جامعہ بنوریہ کے مہتہم مولانامحمدنعیم کے دامادمسعودبیگ کے بہیمانہ قتل پرقائدتحریک الطاف حسین کی جانب سے تعزیت کااظہار
وفدکی جانب سے مولانامسعودبیگ کی مغفرت ،ان کے درجات کی بلندی کے لئے فاتحہ خوانی ،سوگواران کی صبرجمیل کے لئے دعا
ایم کیوایم کے وفدمیں عبدالحسیب،یوسف شاہوانی،محمدحسین اورعلماء کمیٹی کے ارکان شامل تھے
کراچی:۔۔۔۔10ستمبر2014ء
متحدہ قومی موومنٹ کے قائد جناب الطاف حسین کی ہدایت پر رابطہ کمیٹی کے ارکان عبد الحسیب ،یوسف شاہوانی اورحق پرست رکن سندھ اسمبلی محمد حسین پرمشتمل ایم کیوایم کے نمائندہ وفد نے جامعہ بنوریہ کے مہتہم ومعروف عالم دین مولانامفتی محمدنعیم سے ملاقات کی اوران کے دامادوجامعہ بنوریہ کے استادمولانامسعودبیگ کے قتل پرقائدتحریک الطا ف حسین کی جانب سے دلی تعزیت وہمدردی کااظہارکیا۔اس موقع پررابطہ کمیٹی کے ارکان نے مولانامفتی محمدنعیم کوقائدتحریک الطاف حسین کاخصوصی پیغام پہنچایااورمولانامسعودبیگ کے بہیمانہ قتل کو فرقہ وارانہ فسادات کی گھناؤنی سازش کاحصہ قراردیتے ہوئے اورمولانامسعودبیگ کے قتل کی شدیدالفاظ میں مذمت کی اورکہاکہ امن دشمن عناصرشہرکاامن خراب کرنے کی سوچی سمجھی سازش پرعمل پیراہیں۔انہوں نے مولانامسعودبیگ شہیدکی مغفرت ان کے درجات کی بلندی کے لئے فاتحہ خوانی کی اورمفتی محمدنعیم سمیت تمام سوگواران کے صبرجمیل کے لئے خصوصی دعائیں کیں۔اس موقع پرایم کیوایم علماء کمیٹی کے انچارج جاویداحمد ودیگراراکین بھی موجودتھے۔