رکن قومی اسمبلی اعجاز الحق کا ایم کیوایم کے قائد الطاف حسین سے ٹیلی فون پر رابطہ

لندن۔۔۔6، ستمبر2014ء

مسلم لیگ (ضیاء) کے سربراہ اور رکن قومی اسمبلی اعجازالحق نے ہفتہ کی شب ایم کیوایم انٹرنیشنل سیکریٹریٹ رابطہ کرکے ایم کیوایم کے قائد جناب الطاف حسین سے ٹیلی فون پر گفتگو کی اور حق پرست ارکان قومی اسمبلی کے استعفے واپس لینے پر ان کا شکریہ ادا کیا۔ جناب الطاف حسین سے گفتگو کرتے ہوئے اعجاز الحق نے کہاکہ حق پرست ارکاقومی اسمبلی کے استعفے واپس لیکر ایم کیوایم نے پارلیمنٹ اور جمہوریت کیلئے احسن قدم اٹھایاہے جس پر میں ذاتی طورپر بہت خوش ہوں اور آپکا شکرگزار ہوں۔ انہوں نے کہاکہ ملک اورقوم کیلئے آپ کی خدمت قابل تعریف ہیں اور آپ جیسے لیڈروں کی پاکستان کو اشد ضرورت ہے ۔ انہوں نے سابق حق پرست سینیٹر اور معروف عالم دین علامہ عباس کمیلی کے صاحبزادے علی اکبر کمیلی کے سفاکانہ قتل کی شدید الفاظ میں مذمت کی اور جناب الطاف حسین سمیت تمام سوگواران سے دلی تعزیت کا بھی اظہارکیا۔ جناب الطاف حسین نے اظہاریکجہتی پر اعجاز الحق کا شکریہ ادا کرتے ہوئے کہاکہ علی اکبر کمیلی کا سفاکانہ قتل بہت بڑا سانحہ ہے جس کی جتنی بھی مذمت کی جائے کم ہے ۔ انہوں نے کہاکہ میں گزشتہ کئی ہفتوں سے دن رات جاگ کرسیاسی بحران کو افہام وتفہیم سے حل کرنے کی کوشش کرتا رہاہوں، اس وقت مسلح افواج تاریخ کی مشکل ترین جنگ میں مصروف ہے اورملک کے بیشتر حصوں میں طوفانی بارشوں اور سیلابی ریلوں سے عوام شدید مشکلات کا شکار ہیں ۔ وقت کا تقاضہ ہے کہ تمام سیاسی ومذہبی جماعتیں اتحاد ویکجہتی کامظاہرہ کریں اور سیاسی معاملات کو بات چیت کے ذریعہ حل کریں۔