قائد ایم کیوایم الطاف حسین کا علامہ عباس کمیلی سے ٹیلی فون پر اظہار تعزیت

لندن۔۔۔6، ستمبر2014ء

متحدہ قومی موومنٹ کے قائد جناب الطاف حسین نے جعفریہ الائنس کے سربراہ، متحدہ بین المسلمین کے رہنما اور معروف شیعہ عالم دین علامہ عباس کمیلی کو ٹیلی فون کرکے ان کے جواں سال صاحبزادے علامہ علی اکبر کمیلی کی شہادت پر دلی تعزیت اورافسوس کا اظہار کیا۔ اس موقع پر علامہ عباس کمیلی اور جناب الطاف حسین شدت غم سے نڈھال تھے اور زاروقطار روتے رہے۔ جناب الطاف حسین نے دہشت گردوں کے ہاتھوں علامہ علی اکبر کمیلی کے سفاکانہ قتل کی سخت ترین الفاظ میں مذمت کرتے ہوئے کہاکہ جوان بیٹے علی اکبر کمیلی کی شہادت آپ کیلئے بہت بڑاسانحہ ہے اور دکھ کی اس گھڑی میں مجھ سمیت ایم کیوایم کے تمام کارکنان آپ کے غم میں برابر کے شریک ہیں۔ انہوں نے کہاکہ جوسفاک دہشت گرد فرقہ واریت کی بنیاد پر بے گناہ مسلمانوں کو قتل کررہے ہیں وہ انسان کہلانے کے بھی مستحق نہیں ہوسکتے۔ جناب الطاف حسین نے علامہ عباس کمیلی کواس سانحہ پرصبر کی تلقین کرتے ہوئے کہاکہ اللہ تعالیٰ صبر کرنے والوں کے ساتھ ہے اور انشاء اللہ بے گناہ مسلمانوں کے سفاک قاتل اللہ تعالیٰ کے عذاب سے ہرگز نہیں بچ سکیں گے ۔جناب الطاف حسین نے دعا کی کہ اللہ تعالیٰ علی اکبر شہید کے درجات بلند فرمائے ، انہیں جنت الفردوس میں اعلیٰ مقام عطا کرے اور سوگوارلواحقین کو یہ صدمہ برداشت کرنے کاحوصلہ دے ۔ (آمین)