پنجاب میں موسلادھار بارش اور سیلابی ریلوں سے ہونے والے شدید جانی و مالی نقصانات سے حکومت سندھ سبق حاصل کرے، حق پرست اراکین سینٹ

کراچی ۔۔۔5، ستمبر2014ء

حق پرست اراکین سینیٹ نے کہا ہے کہ پنجاب میں موسلادھار بارش اور سیلابی ریلوں سے ہونے والے شدید جانی و مالی نقصانات سے حکومت سندھ سبق حاصل کرے اور سندھ میں ممکنہ طوفانی بارشوں سے عوام کی جان ومال کے تحفظ کیلئے حکومت سندھ فی الفور ’’رین ایمرجنسی ‘‘کے نفاذ کا اعلان کرے۔ اپنے مشترکہ بیان میں انہوں نے کہاکہ صوبہ سندھ میں طوفانی بارشوں سے عوام کی جان و مال کے تحفظ کیلئے ٹھوس اور مثبت اقدامات بروئے کار لانا حکومت سندھ کی بنیادی ذمہ داری ہے تاہم افسوسناک صورتحال یہ ہے کہ بارشوں سے تحفظ کیلئے نہ تو متعلقہ اداروں کو پیشگی طور پر متحرک کیاجارہا ہے اور نہ ہی سندھ بھر میں ندی اور نالوں کی صفائی ستھرائی ، خستہ حال بندوں کے کناروں کی مرمت سمیت کسی قسم کے اقدامات دیکھنے میں نہیں آرہے ہیں جس سے عوام میں تشویش کی لہر کا پایا جانا فطری عمل ہے ۔ انہوں نے مزید کہاکہ حکومت سندھ کی جانب سے بلدیاتی اداروں کو ابھی تک فنڈز سے محروم رکھاجارہا ہے اور بارشوں سے ہونے والی تباہی کے پیش نظر بھی بلدیاتی اداروں کو نہ تو فنڈز فراہم کئے جارہے ہیں اور نہ ہی انہیں بارشوں سے پیشگی نمٹنے کیلئے کسی قسم کی ہدایت دی جارہی ہیں اور یہ تمام صورتحال سندھ میں ممکنہ طور پر ہونے والی طوفانی بارشوں کے دوران شدید جانی و مالی نقصان کا سبب بن سکتی ہے ۔ حق پرست اراکین سینیٹ نے گورنر سندھ ڈاکٹر عشرت العباد اور وزیراعلیٰ سندھ سید قائم علی شاہ سے مطالبہ کیا کہ سندھ میں بارشوں سے عوام کی جان ومال کے تحفظ کیلئے فی الفور رین ایمرجنسی کا نفاذ کیاجائے ، بلدیاتی اداروں کو فنڈز فراہم کئے جائیں ، بلدیاتی مشینری کو ٹھیک کرایاجائے اور سندھ بھر میں بارشوں سے وبائی امراض سے بچاؤ اور صحت و صفائی کے حوالے سے ہنگامی بنیاد وں پر کام کرکے حکومت سندھ اپنا بنیادی فریضہ انجام دے ۔