پاکستان کی مسلح افواج ملک کے دفاع اور تحفظ کیلئے ایک مضبوط چٹان ہے اور قوم کو اس پر فخر ہے۔ الطاف حسین

لندن۔۔۔5 ستمبر2014ء

متحدہ قومی موومنٹ کے قائدجناب الطاف حسین نے کہاہے کہ پاکستان کی مسلح افواج ملک کے دفاع اورتحفظ کیلئے ایک مضبوط چٹان ہے اورقوم کواس پر فخرہے۔ یوم دفاع پر اپنے پیغام میں انہوں نے کہاکہ پاکستان کی مسلح افواج نے وطن کی سرحدوں کے دفاع کیلئے ہمیشہ بیش بہاقربانیاں دی ہیں اورگزشتہ کافی عرصہ سے مسلح افواج بیرونی دشمنوں کے ساتھ ساتھ اندرونی دشمنوں سے بھی بڑی بہادری سے نبرد آزما ہیں اور ملک دشمن دہشت گردوں کے خلا ف جاری اس جنگ میں پاک فوج کے ہزاروں جوانوں اور افسروں نے بھی اپنی جانوں کانذرانہ پیش کیاہے جن میں جرنیل اوربریگیڈیئرتک شامل ہیں۔ انہوں نے کہاکہ مسلح افواج آج نہ صرف دہشت گردی کے خلاف جنگ میں مصروف ہے بلکہ طوفانی بارشوں اورسیلاب سے متاثرہ افراد کی بھی مدد کررہی ہے۔ جناب الطاف حسین نے کہاکہ یوم دفاع کے اس موقع پر پوری قوم مسلح افواج کے سربراہوں اور تمام بہادرافسروں اورجوانوں کوان کی جرات پر سلام پیش کرتی ہے اوریہ یقین دلاتی ہے کہ وہ ملک کی بقاء سلامتی اوردفاع کے فریضہ کی انجام دہی میں ہرطرح سے پاک فوج کے ساتھ ہے۔