اے آر وائی نیوز نے جناب الطاف حسین کو انٹرویو کے دوران انتظار کرا کر کروڑوں عوام کے جذبات اور احساسات کو ٹہیس پہنچائی ہے، حق پرست صوبائی وزیر رؤف صدیقی

کراچی ۔۔۔3، ستمبر2014ء

متحدہ قومی موومنٹ کے حق پرست صوبائی وزیر برائے صنعت و تجارت رؤف صدیقی نے اے آر وائی کی جانب سے کروڑوں عوام کے غیر متنازعہ اور ہر دلعزیز قائد جناب الطاف حسین کو ملکی صورتحال پر اہم انٹرویو کے دوران انتظار کرانے اور جاگیردارانہ سوچ کے حامل وڈیرے اور پیر شاہ محمود قریشی کو جناب الطاف حسین پر فوقیت دینے کے عمل کی سخت ترین الفاظ میں مذمت کی ہے۔ اپنے ایک مذمتی بیان میں انہوں نے کہاکہ اے آر وائی کی انتظامیہ نے جناب الطاف حسین کو براہِ راست انٹرویو کے دوران روک کر اور آدھے گھنٹے سے زیادہ انتظار کراکر کروڑوں عوام کے جذبات اور احساسات کو ٹہیس پہنچائی ہے اور وڈیرانہ ذہنیت کے حامل شاہ محمود قریشی کو ترجیح دیکر جناب الطاف حسین کی توہین کی ہے جس کی جتنی بھی مذمت کی جائے کم ہے ۔ انہوں نے کہاکہ جناب الطاف حسین کے انٹرویو کے دوران جب اے آر وائی کی انتظامیہ نے انہیں انتظار کرایا تو انتظامیہ کی سنی گئی گفتگو کے مطابق وہ کہہ رہے تھے کہ جاگیردار اور وڈیرے ہماری ترجیحات میں شامل ہیں ۔ رؤف صدیقی نے کہاکہ اے آر وائی کی اینکر اور انتظامیہ کا عمل نہ صرف کھلی ناانصافی ہے بلکہ صحافتی اصولوں کی بدترین پامالی اور وڈیرانہ ذہنیت کی عکاس ہے ۔