سابق صدرآصف علی زرداری کا قائد ایم کیوایم الطاف حسین سے ٹیلی فون پررابطہ

لندن۔۔۔22، اگست2014ء

سابق صدر پاکستان اور پیپلزپارٹی کے کوچیئرپرسن آصف علی زرداری نے جمعہ کے روز ایم کیوایم کے قائد جناب الطاف حسین سے ٹیلی فون پر رابطہ کیا ۔دونوں رہنماؤں نے ایک دوسرے کی خیریت دریافت کی اورایک دوسرے کی صحت وعافیت کیلئے نیک خواہشات کا اظہارکیا۔ دونوں رہنماؤں کے درمیان ملک میں جاری سیاسی بحران، ملک کی مجموعی سیاسی صورتحال اوردیگر امورپر بات چیت ہوئی۔ دونوں رہنماؤں نے اس بات پر اتفاق کیا کہ سیاسی بحران کے خاتمے کیلئے حکومت اور اپوزیشن دونوں کو بات چیت اور مذاکرات کاراستہ اختیارکرنا چاہیے اور ایسے ہرعمل سے گریز کرنا چاہیے جس سے ملک میں افراتفری اور انتشار کی صورتحال میں اضافہ ہو ۔آصف زرداری نے افہام وتفہیم سے مسائل کے حل کیلئے جناب الطاف حسین کی کاوشوں کو سراہا اورانہیں ہفتہ کے روز وزیراعظم میاں محمد نواز شریف سے اپنی متوقع ملاقات سے بھی آگاہ کیاجس پر جناب الطاف حسین نے دعا کی کہ اللہ تعالیٰ ،ملک کو سیاسی بحران سے نکالنے کیلئے نیک کاوش میں آپ کو کامیابی عطا کرے ۔دریں اثناء گزشتہ رات سابق وفاقی وزیرداخلہ رحمان ملک نے بھی جناب الطاف حسین سے ملک کی موجودہ صورتحال پر تفصیلی گفتگو کی۔