جشن آزادی کے موقع پر کراچی میں دفعہ 144کا نفاذ کرنے پر ایم کیوایم رابطہ کمیٹی کااظہار مذمت

کراچی ۔۔۔13، اگست2014ء 

متحدہ قومی موومنٹ کی رابطہ کمیٹی نے جشن آزادی کے موقع پر کراچی میں دفعہ 144کے نفاذ کی سخت ترین الفاظ میں مذمت کی ہے اور کہا ہے کہ دفعہ 144کا نفاذ کرکے جشن آزادی کی خوشیاں ماند پڑ جائیں گی ۔ ایک بیان میں رابطہ کمیٹی نے کہاکہ 14اگست کو شہر بھر میں جشن آزادی کی تقاریب منعقد کی جاتی ہیں ، لوگوں کی بڑی تعداد مزار قائد پر حاضری دیتی ہے، فاتحہ خوانی کی اور بانی پاکستان قائد اعظم محمد علی جناحؒ کوخراج عقیدت پیش کرتی ہے۔ رابطہ کمیٹی نے کہاکہ کسی بھی ملک کی آزادی کا دن اس کے عوام کیلئے انتہائی اہمیت کا حامل ہوتا ہے، اس دن کو منانے کیلئے دنیا بھر کے ممالک میں خصوصی انتظامات کئے جاتے ہیں جبکہ اس کے برعکس شہر میں14اگست جشن آزادی کے موقع پر دفعہ 144کا نفاذ کردیا گیا ہے جس سے شہریوں اور تمام طبقہ فکر کے افراد میں نہ صرف شدید مایوسی کا احساس پایا جارہا ہے بلکہ جشن آزادی کی تقاریب میں بھی مشکلات کااندیشہ ہے ۔رابطہ کمیٹی نے حکومت سے مطالبہ کیا کہ کراچی میں دفعہ 144فی الفور ہٹائی جائے اور دفعہ 144 کا نفاذ کرکے شہریوں کو جشن آزادی کے موقع پر اپنی حب الوطنی کے اظہار سے محروم کرنے کا عمل بند کرایاجائے ۔