الطاف حسین کی ہدایت پر ماڈل ٹاؤن لاہور میں میڈیکل کیمپ قائم کردیا گیا

متحدہ قومی موومنٹ کے قائد جناب الطاف حسین کی ہدایت پر ماڈل ٹاؤن لاہور میں پاکستان عوامی تحریک کے تحت یوم شہداء کے شرکاء کوطبی امداد کی فراہمی کیلئے میڈیکل کیمپ قائم کردیا گیا ہے جبکہ ایم کیوایم کے تحت یوم شہداء کے شرکاء کیلئے کھانا، پانی اور بچوں کیلئے دودھ فراہمی کا سلسلہ بھی جاری ہے ۔ تفصیلات کے مطابق ایم کیوایم کے فلاحی ادارے خدمت خلق فاؤنڈیشن کے تحت ماڈل ٹاؤن لاہور میں منہاج القرآن سیکریٹریٹ کے قریب میڈیکل کیمپ قائم کردیا گیا ہے جہاں ایم کیوایم میڈیکل ایڈ کمیٹی کے مختلف امراض کے ماہر ڈاکٹرز اورپیرامیڈیکل اسٹاف یوم شہداء کے شرکاء کو علاج ومعالجہ کی سہولیات فراہم کررہے ہیں ۔

دریں اثناء متحدہ قومی موومنٹ کی جانب سے پاکستان عوامی تحریک کے سربراہ ڈاکٹر علامہ طاہرالقادری کی رہائش گاہ پریوم شہداء کے شرکاء کیلئے کھانا، پانی اور دودھ کی فراہمی کا سلسلہ بدستور جاری ہے اورآج بھی ایم کیوایم کے تحت ہزاروں شرکاء کو کھانا ، پانی اور دودھ فراہم کیاگیا جسے پاکستان عوامی تحریک کے رہنماؤں اور کارکنوں کی جانب سے سراہا جارہا ہے ۔

علاوہ ازیں ایم کیوایم کے قائد جناب الطاف حسین نے ماڈل ٹاؤن لاہور میں یوم شہداء کے شرکاء کو علاج ومعالجہ کی سہولیات ، کھانا ، پانی اور بچوں کیلئے دودھ کی فراہمی کے سلسلے میں دن رات مصروف رابطہ کمیٹی کے ارکان ، ایم کیوایم لاہور زون کے ذمہ داران ، خدمت خلق فاؤنڈیشن کے رضاکاروں اور ایم کیوایم میڈیکل ایڈ کمیٹی کے ڈاکٹروں اورپیرامیڈیکل اسٹاف کو سلام تحسین اور زبردست خراج تحسین پیش کیا ہے ۔

*****