ایم کیوایم کی 8 رکنی طبی ٹیم منہاج القرآن کے یوم شہداء کے شرکاء کو طبی سہولیات کی فراہمی کیلئے روانہ ہوگئی

کراچی ۔۔۔10اگست 2014ء

لاہور میں تحریک منہاج القرآن کے زیراہتمام یوم شہداء کے شرکاء کو طبی سہولیات کی فراہمی کیلئے ایم کیوایم میڈیکل ایڈ کمیٹی کی 8رکنی طبی ٹیم اتوار کی شام روانہ کردی گئی ۔ طبی ٹیم کو خورشید بیگم سیکریٹریٹ عزیز آباد سے ایم کیوایم کی رابطہ کمیٹی کے ڈپٹی کنوینرز ڈاکٹر خالد مقبول، ڈاکٹر نصرت اور رابطہ کمیٹی کے دیگر اراکین نے اپنی نگرانی میں روانہ کیا۔ طبی ٹیم کی سربراہی ایم کیوایم میڈیکل ایڈ کمیٹی کے انچارج ڈاکٹر فاروق جمیل کررہے ہیں جبکہ طبی ٹیم مرد اور خواتین ڈاکٹرز اور پیرا میڈیکل اسٹاف کے اراکین پر مشتمل ہے۔ ایم کیوایم کی طبی ٹیم لاہور میں تحریک منہاج القرآن کے تحت ہونے والے یوم شہداء کے شرکاء کو طبی سہولیات کی فراہمی کیلئے مختلف مقامات پر طبی کیمپس قائم کرے گی۔ طبی ٹیم کے پاس مختلف امراض سمیت جان بچانے والی ادویات ، سرجیکل کا سامان اور دیگر طبی آلات وافر مقدار میں موجود ہیں ۔ طبی ٹیم کی روانگی کے موقع پر رابطہ کمیٹی کے ڈپٹی کنوینرز نے گفتگو کرتے ہوئے جناب الطاف حسین کی ہدایت کے مطابق ایم کیوایم کی میڈیکل ٹیم سیاسی مقاصد کے بالاتر ہوکر یوم شہداء کے شرکاء کو خالصتاً طبی سہولیات کی فراہمی کیلئے روانہ کی گئی ہے اور طبی ٹیم میں شامل ایک ایک ڈاکٹر اور پیرا میڈیکل اسٹاف کا عملہ دکھی انسانیت کی خدمت کے جذبے سے سرشار ہے۔