پاکستان عوامی تحریک کے قافلے پر فائرنگ کے نتیجے میں ایک خاتون کارکن کے جاں بحق ہونے اور متعددکے زخمی ہونے پرجناب الطاف حسین کا اظہار افسوس

لندن۔۔۔9 ،اگست 2014ء

متحدہ قومی موومنٹ کے قائد جناب الطاف حسین نے لاہور کے شہر سادھو کی میں پولیس کی جانب سے پاکستان عوامی تحریک کے قافلے پر فائرنگ کے نتیجے میں ایک خاتون کارکن کے جاں بحق ہونے اور متعدد کے زخمی ہونے پر گہرے دکھ افسوس ااظہار کیا ہے۔ ایک بیان میں جناب الطاف حسین کہاکہ پولیس کی جانب سے خواتین کو بالوں سے گھسیٹ کر بے پناہ تشدد کا نشانہ بنانے کے واقعہ پر گہری تشویش اظہار کر تے ہوئے کہاکہ پاکستان عوامی تحریک کے آنے والے پرامن قافلوں پر پولیس کا تشدد اور فائرنگ سمجھ سے بالا تر ہے ۔انہوں نے حکومت سے اپیل کہ وہ خدارا لاٹھی،گولی اورریاستی طاقت کے ذریعے عوام کے احتجاج کودبانے اورعوام کے خلاف طاقت کے استعمال سے ہر قیمت پرگریز کیاجائے۔ جناب الطاف حسین نے سادھو کی میں خاتون کارکن کے جاں بحق ہونے کے واقعہ پر پاکستان عوامی تحریک کے سربراہ علامہ ڈاکٹر طاہر القادری سے دلی تعزیت کا اظہار کرتے ہوئے دعا کی کہ اللہ تعالیٰ جاں بحق ہونے والے خاتون کارکن کی مغفرت فرمائے، انہیں اپنی جوار رحمت میں اعلیٰ مرتبہ عطا کرے، مرحوم کے سوگوار لواحقین کو صبر جمیل عطا فرمائے اور زخمیوں کو جلد صحت یابی دے۔آمین