بھکر میں پولیس کی فائرنگ سے پاکستان عوامی تحریک کے کارکن کی ہلاکت کے واقعہ پر ڈاکٹر طاہرالقادری سے ایم کیوایم کے قائد الطاف حسین کا اظہار تعزیت

لندن۔۔۔8،اگست 2014ء

متحدہ قومی موومنٹ کے قائد جناب الطاف حسین نے پنجاب کے شہر بھکر میں پولیس کی مبینہ فائرنگ سے پاکستان عوامی تحریک کے کارکن کے جاں بحق ہونے اور متعدد کارکنوں کے زخمی ہونے کے واقعہ پر گہرے دکھ اور افسوس کا اظہار کیا ہے۔اپنے ایک بیان میں جناب الطاف حسین نے کہا کہ بھکر سے آنے والے پر امن قافلوں پر پولیس تشدد اور فائرنگ سمجھ سے بالاتر ہے۔انہوں نے ایک بارپھر حکومت سے کہاکہ ریاستی طاقت کے استعمال سے ہرقیمت پر گریز کیاجائے۔ انہوں نے ایک مرتبہ پھر حکومت اور اپوزیشن کی جماعتوں سے اپیل کی کہ وہ اپنااحتجاج ضرور کریں لیکن جہاں بھی کریں آئین اور قانون کے دائرے میں رہتے ہوئے پر امن طریقہ سے کریں اور انسانی جانوں اور املاک کو نقصان پہنچانے سے ہر ممکنہ اجتناب کریں۔جناب الطاف حسین نے بھکرمیں کارکن کے جاں بحق ہونے کے واقعہ پر پاکستان عوامی تحریک کے سربراہ علامہ ڈاکٹر طاہر القادری سے دلی تعزیت کا اظہار کرتے ہوئے دعا کی کہ اللہ تعالیٰ جاں بحق ہونے والے کارکن کی مغفرت فرمائے، انہیں اپنی جوار رحمت میں اعلیٰ مرتبہ عطا کرے، مرحوم کے سوگوار لواحقین کو صبر جمیل عطا فرمائے اور زخمیوں کو جلد صحت یابی دے۔آمین