ایم کیوایم کے قائد الطاف حسین کا پاکستان عوامی تحریک کے ناظم اعلیٰ ڈاکٹر رحیق عباسی سے فون پر رابطہ پنجاب پولیس کی جانب سے ڈاکٹر طاہر القادری کی رہائش گاہ اور منہاج القرآن سیکریٹریٹ کے محاصرے پر اپنی تشویش سے آگاہ کیا

لندن۔۔۔7 اگست 2014ء

متحدہ قومی موومنٹ کے قائدجناب الطا ف حسین نے بدھ اورجمعرات کی درمیانی شب لاہورمیں پنجاب پولیس کی جانب سے پاکستان عوامی تحریک کے سربراہ ڈاکٹرطاہرالقادری کی رہائش گاہ اورتحریک منہاج القرآن کے سیکریٹریٹ کامحاصرہ کئے جانے کی اطلاع ملتے ہی پاکستان عوامی تحریک کے ناظم اعلیٰ ڈاکٹررحیق عباسی سے فون پر رابطہ کیااورانہیں محاصرے کے اقدام پر اپنی گہری تشویش سے آگاہ کیا۔جناب الطاف حسین نے میڈیاپرآنے والی ان اطلاعات پرسخت تشویش کااظہارکیاکہ ڈاکٹرطاہرالقادری کے گھرکو چاروں طرف سے گھیرلیاگیاہے ، وہاں لوگوں کوآنے جانے حتیٰ کہ صحافی برادری کے لوگوں کی آمدورفت میں بھی مشکلات کھڑی کی جارہی ہیں اورپنجاب کے مختلف اضلاع میں بھی مختلف جگہوں پر پاکستان عوامی تحریک کے کارکنوں کی گرفتاریاں بھی کی جارہی ہیں۔انہوں نے کہاکہ محاصروں، چھاپوں ،گرفتاریوں اورریاستی طاقت کااستعمال کبھی کسی ملک کے مسائل کاحل نہیں نکال سکتا۔ جناب الطا ف حسین نے کہاکہ میں پہلے بھی حکومت سے کہتارہاہوں اوراب پھرکہتاہوں کہ خدارالاٹھی، گولی اورریاستی طاقت کے استعمال سے ہرقیمت پر گریز کیاجائے ، پرامن اور قانونی طریقے سے احتجاج کرنااپوزیشن کاحق ہے اوراس احتجاج کودبانے کیلئے غیرقانونی طریقے اختیارنہ کئے جائیں،اسی طرح احتجاج کرنے والے بھی قانون کے دائرے میں رہتے ہوئے پرامن طریقے سے احتجاج کریں۔ جناب الطا ف حسین نے ڈاکٹررحیق عباسی سے کہا کہ آپ ڈاکٹرطاہرالقادری کومیراسلام پہنچائیں ، میری تمام ترہمدردیاں اوردعائیں ان کے ساتھ ہیں۔ڈاکٹررحیق عباسی نے فون کرنے اور اظہار ہمدردی پر جناب الطا ف حسین کاشکریہ اداکرتے ہوئے کہاکہ اس موقع پر آپ کے فون اوراظہارہمدردی سے ہمارے حوصلے بہت بلند ہوئے ہیں اورہم سب باہمت ہیں ۔ جناب الطا ف حسین نے اس نازک وقت میں پاکستان عوامی تحریک کے کارکنوں کی جرات وہمت اور حوصلے کوبھی سراہا اور ڈاکٹر رحیق عباسی سے کہاکہ وہ کارکنوں کو بھی میرا سلام پہنچائیں۔