قائدتحریک جناب الطاف حسین نے اس ملک میں سیاست کو ایک نیا رخ دیا اور سیاست میں خدمتِ انسانیت کے عمل کو متعارف کرایا جس کی مثال نہیں ملتی،رکن رابطہ کمیٹی گلفراز خان خٹک

کراچی ۔۔۔27، جولائی 2014ء

متحدہ قومی موومنٹ کی رابطہ کمیٹی کے رکن گلفراز خان خٹک نے کہا ہے کہ جناب الطاف حسین ملک کے واحد لیڈر ہیں جنہوں نے سیاست کے نئے دریچے کھولے ، جمہوریت کو اس کی اصل روح کے مطابق متعارف کرایا اور سیاست کو انسانیت کی خدمت سے مربوط کیا۔ ان خیالا ت کااظہار انہوں نے گزشتہ روز ایم کیوایم کراچی مضافاتی آرگنائزنگ کمیٹی کے زیراہتمام گلشن حدید میں بن قاسم سیکٹر کے معززین اور مختلف طبقہ فکر سے تعلق رکھنے والے افراد کے اعزاز میں دیئے گئے افطار ڈنر سے خطاب کرتے ہوئے کیا ۔ تقریب سے حق پرست رکن قومی اسمبلی ساجد احمد اور حق پرست رکن سندھ اسمبلی ہیر سوہو نے بھی خطاب کیا ۔ گلفراز خان خٹک نے افطار ڈنر کے شرکاء سے خطاب کرتے ہوئے کہاکہ جناب الطاف حسین کی قیادت میں ایم کیوایم ملک بھر میں قومی یکجہتی اور اتحاد کو فروغ دیکر تمام قومیتوں کے درمیان پیار محبت پیدا کرکے نفرتوں کے خاتمے کیلئے جو عملی کردار ادا کررہی ہے اسے تاریخ میں سنہری الفاظ میں لکھاجائے گا ۔ انہوں نے کہاکہ جناب الطاف حسین65برسوں سے ملک میں رائج فرسودہ، ظالمانہ ، جاگیردارانہ اور طبقاتی نظام کے خاتمے اوربرابری پر مبنی منصفانہ نظام کے لئے جدوجہد کر رہے ہیں۔جناب الطاف حسین نے اس ملک میں سیاست کو ایک نیا رخ دیا اور سیاست میں خدمتِ انسانیت کے عمل کو متعارف کرایاجس کی مثال اس سے پیشتر نہیں ملتی، آزاد کشمیر کا زلزلہ ہو یا ایران کے شہر بام کا زلزلہ، ناگہانی آفات ہوںیا سیلاب کی تباہ کاریاں ہر جگہKKFکے رضاکار سب سے پہلے امداد لیکرپہنچتے ہیں۔ افطار پارٹی کے شرکاء سے خطاب کرتے ہوئے رکن قومی اسمبلی ساجد احمد نے کہا کہ جناب الطاف حسین نے غریب اور متوسط تعلیم یافتہ طبقے کے افراد کو اسمبلیوں میں بھیج کر ملک میں ایک نئی روایت ڈالی اوران منتخب افراد نے جناب الطاف حسین کی تعلیمات کی روشنی میں اپنے انتخاب کو درست ثابت کیا جس کی وجہ سے آج دیگر جماعتیں بھی تعلیم یافتہ نوجوانوں کو ان کا حق دینے پر مجبو ر ہیں۔رکن سندھ اسمبلی ہیرسوہونے کہا کہ اگر کوئی شخصیت اس ملک کو جاگیر دارانہ نظام سے چھٹکارادلاسکتی ہے تو وہ صرف اورصرف جناب الطاف حسین ہیں۔یہی وجہ ہے آج ملک کی تمام ہی قومیتوں سے تعلق رکھنے والے افراد ایم کیو ایم کے ساتھ ہیں بلکہ اسمبلیوں میں بھی موجود ہیں۔افطار ڈنر میں بن قاسم سیکٹر کے معززین اور مختلف طبقہ فکرسے تعلق رکھنے والے افراد نے بڑی تعداد میں شرکت کی۔