کراچی میں چند مفادپرست پولیس اہلکاروں کی جانب سے معصوم شہریوں کو حراساں کرکے رشوت طلب کرنے کے واقعات پرحق پرست اراکین سندھ اسمبلی کااظہار تشویش

کراچی ۔۔۔27جولائی2014ء

متحدہ قومی موومنٹ کے حق پرست اراکین سندھ اسمبلی نے کراچی میں عید کے موقع پر چند مفاد پرست پولیس اہلکاروں کی جانب سے معصوم شہریوں کو حراساں کرکے رشوت طلب کرنے کے واقعات میں پر گہری تشویش کا اظہار کیا ہے ۔حق پرست اراکین سندھ اسمبلی نے کہا کہ شہر میں عیدکے موقع پر اسنیپ چیکنگ اور تلاشی کے نام پر جگہ جگہ ناکے لگا کر معصوم و بیگناہ شہریوں کو تنگ کیا جارہاہے اور عیدی کے نام پر روزانہ لاکھوں روپے رشوت طلب کئے جارہے ہیں ۔انھوں نے کہا کہ ایک جانب شہر میں دہشت گردوں کی جانب سے پے درپے پولیس کے اعلیٰ عہدیداران او ر اہلکاروں کو نشانہ بنایا جارہا ہے او ر پولیس اہلکار جام شہادت نوش کر رہے ہیں جبکہ دوسری طرف چند مفاد پرست و بے ضمیر پولیس اہلکاروں کی جانب سے شہریوں کو حراساں کرنے کا عمل تسلسل سے جاری ہے جس سے عوام کے دلوں میں پولیس کے پورے ادارے کیلئے ناپسندیدگی میں اضافہ ہورہا ہے اور اس تمام تر صورتحال پر اعلیٰ انتظامیہ خاموش تماشائی بنی بیٹھی ہے ۔حق پرست اراکین اسمبلی نے گورنر سندھ ڈاکٹر عشرت العباد خان، وزیر اعلیٰ سندھ سید قائم علی شاہ اور قائم مقام آئی جی سندھ سے مطالبہ کیا کہ وہ شہریوں کو تلاشی کے نام پر حراساں کرنے والے اہلکاروں کے خلاف کا ر روائی عمل میں لائیں اور عید کے موقع پر شہریوں کی مشکلات کو کم کرنے میں اپنا کردار ادا کریں ۔