خدمت خلق فاؤنڈیشن کو عطیات دینے والے افراد سے الطاف حسین کا اظہار تشکر
اللہ تعالیٰ عطیات دینے والوں پر اپنا فضل و کرم فرمائے اور انکے کاروبار میں برکت عطا کرے، الطاف حسین
اللہ تعالیٰ بچیوں کیلئے نیک اور صالح رشتے مہیا کرے، الطاف حسین کی دعائیں
لندن۔۔۔25، جولائی2014ء
متحدہ قومی موومنٹ کے قائد جناب الطاف حسین نے خدمت خلق فاؤنڈیشن کے تحت سالانہ امدادی پروگرام کے شرکاء سے ٹیلی فونک خطاب کرتے ہوئے خدمت خلق فاؤنڈیشن کوعطیات دینے والے افرادسے دلی تشکرکااظہارکیا ہے ۔ انہوں نے دعا کی کہ غریب ومستحق افراد کی امداد کیلئے جن صاحب ثروت شخصیات اور عوام نے خدمت خلق فاؤنڈیشن کی مدد کی ، اللہ تعالیٰ ان پر اپنا فضل وکرم فرمائے اورانکے کاروبار میں برکت عطا کرے ۔ پاکستان کو دہشت گردی کی لعنت سے پاک کرے ، ایم کیوایم کے تمام حق پرست شہداء اور لاپتہ ساتھیوں کے کردہ ناکردہ گناہوں کو معاف فرمائے اور حق پرستی کی تحریک کو کامیابی سے ہمکنارکرے ۔جناب الطاف حسین نے دعا کی کہ جوبچیاں غیرشادی شدہ ہیں اوراپنے گھروں پر بیٹھی ہوئی ہیں اللہ تعالیٰ ان کیلئے نیک اورصالح رشتے مہیاکرے تاکہ وہ اپنے گھروں کو رخصت ہوسکیں۔