رانا ثناء اللہ یہ نہ بھولیں کہ قابضین سب سے پہلے مالک مکان کوہی باہر نکال کرپھینکتے ہیں، قاسم علی رضا

لندن۔۔۔20، جولائی2014ء

متحدہ قومی موومنٹ کی رابطہ کمیٹی کے رکن قاسم علی رضا نے پنجاب کے سابق وزیرقانون رانا ثناء اللہ کے بیان جس میں انہوں نے کہاہے کہ’’ آمریت کے دور میں پارٹی چھوڑ کرجانے والے آج پارٹی کے وارث بنے بیٹھے ہیں‘‘ پر تبصرہ کرتے ہوئے کہاہے کہ اب پچھتائے کیا ہوت ۔۔۔جب چڑیا چگ گئیں کھیت‘‘۔ ایک بیان میں قاسم علی رضا نے رانا ثناء اللہ کو مخاطب کرتے ہوئے کہاکہ انہیں چاہیے کہ وہ اب اللہ اللہ کریں اور اپنی پارٹی پر قبضہ کے حوالہ سے اقراری بیان دیتے ہوئے یہ نہ بھولیں کہ قابضین ہمیشہ قبضہ کرنے کے بعد سب سے پہلے مالک مکان کوہی باہر نکال کرپھینکتے ہیں۔ قاسم علی رضا نے راناثناء اللہ سے گزارش کی کہ وہ ایسے بیانات دیکر حاسدین اور جلنے والوں کو مزید توانائی نہ پہنچائیں اور اپنی تمام ترتوانائی اپنے مسئلہ کو صبروتحمل سے حل کرنے میں صرف کریں تو زیادہ بہتر ہوگا۔