ایم کیو ایم کی رابطہ کمیٹی کا پشاور کے علاقے پشتہ خرہ میں پولیس موبائل پر دہشتگردوں کی فائرنگ کی مذمت
واقعہ میں شہید اور زخمی ہونے والے پولیس اہلکاروں کے لئے دعا
دہشتگرد پولیس و دیگر قانون نافذ کرنے والے اداروں کو نشانہ بنا کر عوام میں خوف پیدا کرنا چاہتے ہیں، ایم کیو ایم رابطہ کمیٹی
پولیس اہلکاروں کے قتل میں ملوث عناصر کوفی الفور گرفتار کر کے قرار واقعی سزا دیکر عوام کے جان و مال کا تحفظ یقینی بنایا جائے
رابطہ کمیٹی کا وفاقی و صوبائی حکومت سے مطالبہ
کراچی ۔۔۔18جولائی2014ء
متحدہ قومی موومنٹ کی رابطہ کمیٹی نے پشاور کے علاقے پشتہ خرہ میں پولیس موبائل پر دہشتگردوں کی فائرنگ کے نتیجے میں اے ایس آئی سمیت 3پولیس اہلکاروں کی شہادت اور متعدد کے زخمی ہونے پر گہرے دکھ اور افسوس کا اظہار کیا ہے ۔ ایک بیان میں رابطہ کمیٹی نے پولیس موبائل پر حملے کو بزدلانہ کار روائی قرار دیتے ہوئے اس کی سخت الفاظ میں مذمت کی اورکہا کہ دہشتگرد پولیس سمیت دیگر قانون نافذ کرنے والے اداروں کو پے در پے نشانہ بنا کر عوام میں خوف وہراس پیدا کرنا چاہتے ہیں اور اپنی بزدلانہ کار روائیوں کے ذریعے ملک کو غیر مستحکم کر نے کی ساز ش کر رہے ہیں۔ رابطہ کمیٹی نے دعا کی کہ اللہ تعالیٰ فائرنگ کے نتیجے میں شہید ہونے والے پولیس اہلکاروں کے درجات بلند فرمائے اور زخمیوں کو جلد و مکمل صحتیابی عطا فرمائے ۔رابطہ کمیٹی نے وزیر اعظم میاں محمد نواز شریف ، وفاقی وزیر داخلہ چوہدری نثار علی خان، وزیر اعلیٰ خیبر پختونخواہ پرویز خٹک اور دیگر متعلقہ حکام سے مطالبہ کیا کہ و ہ پولیس اہلکاروں کے قتل میں ملوث عناصر اور انکے سرغنہء کو گرفتار کر کے قرار واقعی سزا دیں اور خیبر پختونخواہ میں عوام کے جان و مال کے تحفظ کو یقینی بنائیں