سینٹرل ڈیولپمنٹ ورگنگ پارٹی کے اجلاس میں کراچی کو فراہمی آب کے منصوبے K-4 کی منظوری اور آئندہ اجلاسوں میں شہر کے دیگر بڑے منصوبوں کو شامل کر نے کی یقین دہانی خوش آئند ہے، ڈاکٹر فاروق ستار

اسلام آباد ۔۔۔17جولائی2014ء 

متحد ہ قومی موومنٹ کی رابطہ کمیٹی کے رکن اور حق پرست رکن قومی اسمبلی ڈاکٹر فاروق ستار نے وزیر اعظم میاں محمد نواز شریف کے خصوصی احکامات کے بعد سینٹرل ڈیولپمنٹ ورگنگ پارٹی کے اجلاس میں کراچی کو فراہمی آب کے بڑے منصوبے K-4 کی منظوری اور سی ڈی ڈبلیو پی و ایگزیکٹوکمیٹی فار نیشنل اکنامک کونسل کے آئندہ اجلاسوں میں کراچی کے شہریوں کی فلاح کے لئے دیگر بڑے منصوبوں کو شامل کر نے کی یقین دہانی کوخوش آئند قرار دیا ہے۔ ڈاکٹر فاروق ستار نے کہا کہ ایم کیو ایم نے ہمیشہ عوامی مسائل حل کرنے کو ترجیح دی ہے اور کوشش کی ہے کہ ارباب اختیار کو عوامی مشکلات سے آگاہ کر کے ان مسائل کی حل کو یقینی بنایا جائے۔ ڈاکٹر فاروق ستا ر نے کہا کہ ایم کیو ایم نے گزشتہ اجلاسوں میں بھی وزیر اعظم میاں محمد نوازشریف کی توجہ کراچی کو فراہمی آب کے منصوبے K-4 اوردیگر بڑے تعمیراتی منصوبوں کی جانب مبذول کروائی تھی لیکن وزیر اعظم کی یقین دہانی کے باوجود ان منصوبوں کو ایکنیک اور سی ڈی ڈبلیو پی کے گزشتہ اجلاسوں میں شامل نہیں کیا گیا تھا لیکن ایک مرتبہ پھر وزیر اعظم میاں محمد نواز شریف کی توجہ کراچی کے شہریوں کی فلاح کی جانب دلانے پر وزیر اعظم نے اپنے پرنسپل سیکریٹری جاوید اسلم کو ہدایت کی کہ وہ ایکنیک اور سی ڈی ڈبلیو پی کے آئندہ اجلاسوں میں کراچی کے اہم منصوبوں کو لازمی طور پر شامل کریں۔ڈاکٹر فاروق ستار نے وزیر اعظم میاں محمد نوازشریف کی جانب سے کراچی کے اہم منصوبوں پر توجہ دینے پر ایم کیو ایم کے قائد جناب الطاف حسین کی جانب سے انکا شکریہ ادا کیا ہے اور امید کا اظہار کیا ہے کہ حکومت مستقبل میں بھی کراچی کے شہریوں کی فلاح کے لئے مستقبل میں بھی احکامات جاری کرتی رہے گی۔