پاکستانی صحافی فیض اللہ خان کوافغان عدالت کی جانب سے چار سال قید کی سزا دیئے جانے پر ایم کیوایم کے قائد الطا ف حسین کا افغان صدر حامد کرزئی کے نام خط

لندن۔۔۔14 جولائی 2014ء

متحدہ قومی موومنٹ کے قائدجناب الطاف حسین نے پاکستانی صحافی فیض اللہ خان کوافغان عدالت کی جانب سے چارسال قید کی سزا دیئے جانے پرگہری تشویش کااظہار کرتے ہوئے افغان صدرحامدکرزئی کے نام ایک خط تحریر کیاہے جس میں انہوں نے افغان صدر سے اپیل کی ہے کہ فیض اللہ خان کودی جانے والی سزاپرانسانی ہمدردی کی بنیادپر نظرثانی کرتے ہوئے انہیں فی الفوررہا کیا جائے ۔ اپنے خط میں جناب الطاف حسین نے کہاکہ میڈیاپرآنے والی رپورٹس کے مطابق فیض اللہ خان ایک صحافی ہیں اوراپنے پیشہ وارانہ فرائض کی ادائیگی کے سلسلے میں قبائلی علاقے میں گئے تھے اورغلطی سے افغان سرحدعبورکرگئے تھے ۔ انہوں نے افغان صدرحامد کرزئی سے اپیل کی کہ انسانی ہمدردی کی بنیاد پر فیض اللہ خان کو دی جانے والی سزاپرنظرثانی کی جائے اوران کی سزاکوختم کرکے ان کی فوری بحفاظت پاکستان واپسی کویقینی بنایاجائے۔دریں اثناء اپنے بیان میں جناب الطاف حسین نے حکومت پاکستان سے اپیل کی کہ فیض اللہ خان کی سزاکے خاتمہ اورپاکستان واپسی کیلئے سفارتی سطح پرہرممکن کوششیں کی جائیں۔انہوں نے فیض اللہ خان کے اہل خانہ سے دلی ہمدردی کا اظہار کیا۔