نامعلوم افراد کی فائرنگ سے ایم کیوایم ملیر سیکٹریونٹ95کے کارکن سید منظر عباس زیدی کے بہیمانہ قتل پر رابطہ کمیٹی کااظہار مذمت

کراچی۔۔۔13جولائی 2014ء

متحدہ قومی موومنٹ کی رابطہ کمیٹی نے نامعلوم افراد کی فائرنگ سے ایم کیوایم ملیر سیکٹریونٹ95کے کارکن سید منظر عباس زیدی کے بہیمانہ قتل پر سخت ترین الفاظ میں مذمت کی ہے اور واقعہ کوشہر میں فرقہ وارانہ فسادات کرانے کی سازش کا حصہ قرار دیاہے۔ ایک بیان میں رابطہ کمیٹی نے کہاکہ سید منظر عباس زیدی واٹر پمپ فیڈرل بی ایریا میں دوکان پر بیٹھے ہوئے تھے کہ نامعلوم افراد نے انہیں اندھا دھند فائرنگ کرکے شہید کر دیا۔رابطہ کمیٹی نے کہاکہ ایک جانب تو ایم کیوایم کے کارکنان کی بلاجواز گرفتاریوں کا سلسلہ جاری ہے اور دوسری جانب کارکنان اور ہمدروں کو چن چن کر قتل کیا جارہا ہے جس کی جتنی بھی مذمت کی جائے کم ہے۔ رابطہ کمیٹی نے وزیر اعلی سندھ سید قائم علی شاہ ، گور نر سندھ ڈاکٹر عشرت اوروفاقی وزیر داخلہ چوہدری نثار علی خان سے مطالبہ کیا ہے وہ سید منظر عباس کے قتل کا نوٹس لیں اور اس میں ملوث دہشت گردوں کو گرفتار کرکے قانون کے مطابق سخت سے سخت سزادی جائے۔