آٹے کی قیمتوں میں اضافے پر ایم کیوایم رابطہ کمیٹی کا اظہار مذمت
عوام کو مہنگائی کے بوجھ تلے دبانے والے ناجائز منافع خوروں کے خلاف قانون کے مطابق سخت ترین کارروائی عمل میں لائی جائے، رابطہ کمیٹی ایم کیوایم
عوام مہنگائی کے بوجھ تلے دبے ہیں جبکہ ناجائز منافع خوروں کی جانب سے من مانیاں کرکے مشکلات میں مزید اضافہ کیا جارہا ہے، رابطہ کمیٹی ایم کیوایم
ٌکراچی ۔۔۔11، جولائی 2014ء
متحدہ قومی موومنٹ کی رابطہ کمیٹی نے ناجائز منافع خوروں کی جانب سے آٹے کی قیمتوں میں اضافہ کرنے کی سخت ترین الفاظ میں مذمت کی ہے اور اسے رمضان المبارک کے مقدس مہینے میں عوام کی مشکلات میں مزید اضافے کا باعث قرار دیا ہے ۔ ایک بیان میں رابطہ کمیٹی نے کہاکہ ایک جانب عوام پہلے ہی ہوش رباء مہنگائی اور بے روزگاری کے بوجھ تلے دبے ہوئے ہیں جبکہ دوسری طرف رمضان المبارک میں عوام کیلئے بنیادی استعمال کی اشیاء کی قیمتوں میں کمی لانے کے بجائے ناجائز منافع خور نہ صرف من مانیاں کررہے ہیں بلکہ رمضان المبارک کے مقدس مہینے کا تقدس بھی پامال کررہے ہیں جس کی جتنی بھی مذمت کی جائے کم ہے ۔ رابطہ کمیٹی نے وزیراعظم نواز شریف اور وزیراعلیٰ سندھ سید قائم علی شاہ سے مطالبہ کیا کہ آٹے کی قیمتوں میں اضافے کے غیر دانشمندانہ اقدام کا فی الفور نوٹس لیاجائے ، عوام کیلئے آٹے سمیت ضروریات زندگی کی بنیادی اشیاء کی قیمتوں میں توازن برقرار رکھنے کیلئے فی الفور مثبت نوعیت کے اقدامات بروئے کار لائے جائیں اور عوام کو مہنگائی کے بوجھ تلے دبانے والے ناجائز منافع خوروں کے خلاف قانون کے مطابق سخت ترین کارروائی عمل میں لائی جائے ۔