قیام پاکستان کی تحریک میں محترمہ فاطمہ جناح کا کردار ناقابل فراموش ہے۔الطاف حسین

لندن۔۔۔9 جولائی 2014ء

متحدہ قومی موومنٹ کے قائدجناب الطاف حسین نے بانی پاکستان قائداعظم محمدعلی جناح کی ہمشیرہ،تحریک پاکستان کی عظیم رہنما مادرملت محترمہ فاطمہ جناح کی 47 ویں برسی پر انہیں زبردست خراج عقیدت پیش کیاہے۔ اپنے ایک بیان میں انہوں نے کہاکہ قیام پاکستان کی تحریک میں محترمہ فاطمہ جناح کا کردار ناقابل فراموش ہے۔انہوں نے قائداعظم کے ساتھ قدم سے قدم ملاکرجدوجہدکی اوراس جدوجہدکی خاطرانہوں نے اپنی خواہشات اورامنگوں کوقربان کردیا ۔ قیام پاکستان کے بعدبھی جب ملک میں جنرل ایوب خان نے مارشل لاء نافذ کیاتوانہوں نے میدان عمل میں آکراس فوجی آمریت کے خلاف جدوجہد کی۔آمریت کے خلاف آوازبلندکرنے کی پاداش میں اس وقت کے حکمرانوں نے محترمہ فاطمہ جناح جیسی شخصیت پر شرمناک الزامات لگائے لیکن انہوں نے پاکستان کے عوام کی خاطران الزامات کی پرواہ نہ کی۔ جناب الطاف حسین نے کہاکہ محترمہ فاطمہ جناح کاکرداراوران کی عملی جدوجہدایک مشعل راہ کی حیثیت رکھتی ہے۔ان کی جدوجہد سے خواتین کیلئے بھی پیغام ملتاہے کہ اگرخواتین چاہیں توکسی بھی جدوجہدمیں وہ کسی سے پچھلے نہیں رہ سکتیں ۔ انہوں نے محترمہ فاطمہ جناح کوزبردست خراج عقیدت پیش کیااوردعاکی کہ اللہ تعالیٰ ان کی قربانیوں کوقبول فرمائے اورانہیں جنت الفردوس میں اعلیٰ مقام عطا کرے۔