عوام، مسلح افواج سے اظہار یکجہتی کیلئے کل ایم کیوایم کے تحت اجتماع میں بھرپور شرکت کریں، الطاف حسین

نائن زیرو پر ایم کیوایم کے تمام شعبہ جات کے ارکان سے ٹیلی فون پر بات چیت

لندن۔۔۔5، جولائی2014ء

متحدہ قومی موومنٹ کے قائدجناب الطاف حسین نے کہاہے کہ پاکستان کی بقاء وسلامتی کیلئے اتحاد بین المذاہب، مذہبی رواداری اور فرقہ وارانہ ہم آہنگی وقت کی اہم ترین ضرورت ہے ۔ انہوں نے زندگی کے تمام شعبوں سے تعلق رکھنے والے افراد سے پرزوراپیل کی کہ وہ مسلح افواج سے اظہاریکجہتی کیلئے ایم کیوایم کے تحت اجتماع میں بھرپور شرکت کریں ۔ہفتہ کے روز ایم کیوایم کے مرکزنائن زیروعزیزآباد میں تمام شعبہ جات کے ارکان سے ٹیلی فون پر بات چیت کرتے ہوئے جناب الطاف حسین نے کہاکہ کل بروز اتوار ملک بھرکے محب وطن عوام ،مسلح افواج کے افسران وجوانوں سے اظہاریکجہتی کریں گے جو پاکستان اور دنیا بھر کو دہشت گردی سے پاک کرنے کیلئے اپنی جانوں کا نذرانہ پیش کررہے ہیں ۔دہشت گردی کے خلاف نبردآزماپاک فوج کے افسران اور جوانوں سے اظہاریکجہتی کیلئے ایم کیوایم کے تحت کل بروزاتوارشام 4 بجے کراچی میں قائد اعظم کے مزار سے متصل جناح پارک میں عظیم الشان اجتماع منعقد کیاجائے گا ۔جناب الطاف حسین نے پاکستان کی تمام لسانی ، نسلی اورثقافتی اکائیوں سے اپیل کی کہ وہ اس اجتماع میں اپنے اہل خانہ کے ہمراہ بھرپورشرکت کریں۔ انہوں نے پاکستان میں بسنے والے غیرمسلموں پر بھی زور دیا کہ وہ بھی پاک فوج سے اظہاریکجہتی کے اجتماع میں بھرپورشرکت کریں ۔