رمضان میں بم دھماکہ اس بات کی نشاندہی کرتا ہے کہ دہشت گردوں کا دین و مذہب سے کوئی واسطہ نہیں۔ایم کیوایم رابطہ کمیٹی

کراچی ۔۔۔04جولائی 2014ء

متحد ہ قومی موومنٹ کی رابطہ کمیٹی نے کراچی کے علاقے صدر میں پارکنگ پلازہ کے قریب مسجد کے باہر بم دھماکے کی سخت الفاظ میں مذمت کی ہے ۔ اپنے ایک بیان میں رابطہ کمیٹی نے کہا کہ رمضان کے مبارک مہینے میں جمعے کے بابرکت دن بم دھماکہ اس بات کی واضح نشاندہی کرتا ہے کہ دہشت گردوں کا انسانیت اور مذہب کے سے کوئی واسطہ نہیں ۔ رابطہ کمیٹی نے کہا کہ دہشت گردی نے پاکستان کو چاروں اطراف سے جکڑ لیا ہے ۔ پاکستان کی مسلح افواج شمالی وزیرستان میں دہشت گردوں کے خلاف ایک فیصلہ کن جنگ میں مصروف ہیں اورپوری قوم اپنی افواج سے یکجہتی کا اظہار کررہی ہے ۔ رابطہ کمیٹی نے کہا کہ ضرورت اس بات کی ہے کہ شمالی وزیرستان میں جاری آپریشن کے ممکنہ ردّعمل سے شہریوں کومحفوظ رکھنے کے لئے کراچی سمیت ملک بھر میں سیکوریٹی کے خصوصی انتظامات کئے جائیں۔

رابطہ کمیٹی نے بم دھماکے میں جاں بحق ہونے والے افراد کے لواحقین سے دلی ہمدردی کا اظہار کیا اور زخمی ہونے والے افراد کی جلد و مکمل صحت یابی کے لئے دعا کی۔ رابطہ کمیٹی نے حکومت سے مطالبہ کیا کہ زخمیوں کے علاج میں کوئی کسر نہ چھوڑی جائے۔ رابطہ کمیٹی نے وزیر اعلیٰ سندھ اور وفاقی وزیر داخلہ سے مطالبہ کیا کہ کراچی میں سیکوریٹی کے اقدامات کو بہتر کرنے کے لئے فوری اقدامات کئے جائیں۔