ایم کیو ایم رابطہ کمیٹی کے اراکین کی سابق صدر پرویز مشرف سے ملاقات

کراچی ۔۔۔4جولائی2014ء

متحدہ قومی موومنٹ کی رابطہ کمیٹی کے اراکین اور حق پرست اراکین اسمبلی پر مشتمل وفد کی سابق صدر و سابق آرمی چیف جنرل (ر) پرویز مشرف سے کراچی میں انکی رہائشگاہ میں ملاقات کی ۔ ایم کیو ایم کے وفد میں رابطہ کمیٹی کے رکن بابر غوری،ڈاکٹر صغیر احمد ، عادل صدیقی ،گلفراز خان خٹک،معاون رابطہ کمیٹی وسیم اختر اورحق پرست رکن سندھ اسمبلی بلقیس مختار شامل تھے ۔ وفد نے سابق صدر پرویز مشرف کو جناب الطاف حسین کی جانب سے ایم کیو ایم کے تحت 6جولائی کو پاکستان کی مسلح افواج سے اظہار یکجہتی کے لئے منعقد ہونے والے اجتماع میں شرکت کی عوت دی اور جناب الطاف حسین کی جانب سے انکے لئے نیک خواہشات کا پیغا م پہنچایا ۔وفد کے اراکین نے پرویز مشرف سے گفتگو کرتے ہوئے کہا کہ پاکستان کو موجودہ حالات میں چاروں اطراف سے بدترین اندرونی و بیرونی سازشوں کا سامنا ہے اور ملک کے مسلح افواج ان سازشوں کے خلاف جواں مردی سے لڑتے ہوئے اپنی جانوں کے نذرانے پیش کر رہے ہیں۔رابطہ کمیٹی نے کہا کہ وقت کایہ تقاضہ ہے کے پوری قوم پاک افواج کے شانہ بشانہ ملک کی بقا ؤ سلامتی کے لئے میدان عمل میں آئے اور افواج کو اپنی حمایت کا یقین دلائے۔ ملاقات کے موقع پر سابق صدر پرویز مشر ف نے ملک کی مسلح افواج سے اظہار یکجہتی کے لئے جناب الطاف حسین کی جانب سے اُٹھائے جانے والے مثبت اقدام کو سراہا اور جلسے کی دعوت دینے پر جناب الطاف حسین کا شکریہ اداکرتے ہوئے جلسے میں شرکت کی یقین دہانی بھی کروائی۔