ملک کو دہشت گردوں سے نجات دلانے کے لئے ایم کیوایم کی خواتین کا رکنان بھی مسلح افواج کےشانہ بشانہ ہیں، الطاف حسین

لندن ۔2جولائی 2014ء

متحدہ قومی موومنٹ کے قائد جناب الطاف حسین نے کہا ہے کہ دہشت گردوں سے نمٹنے اورملک کو دہشت گردوں سے نجات دلانے کے لئے ایم کیوایم کے صرف نوجوان او ربزرگ ہی نہیں بلکہ خواتین کا رکنان بھی مسلح افواج کے شانہ بشانہ ہیں ۔انہوں نے یہ بات آج ایم کیوایم کے مرکز نائن زیرو پر ایم کیوایم شعبہ خواتین کی مرکزی کمیٹی ،دیگر شعبہ جات میں تنظیمی خدمات انجام دینے والی خواتین کارکنان او رخواتین ارکان اسمبلی سے گفتگو کر تے ہوئے کہی ۔ جناب الطاف حسین نے کہا کہ ایم کیوایم کی جدوجہد میں خواتین نے جو کر دار ادا کیا ہے وہ ناقابل فرامو ش ہے ۔19فروری 2011ء کو کراچی کے جناح پارک میں ایم کیوایم کے زیر اہتمام منعقدہ ہونے والے خواتین کے جلسہ عام میں خواتین نے لاکھوں کی تعداد میں شرکت کر کے اسے دنیا کی تاریخ کا خواتین کا سب بڑا جلسہ بنا کر ایک ایسی تاریخ رقم کی جس کی مثال ملنا مشکل ہے ۔ جناب الطاف حسین نے کہا کہ ایم کیوایم 6جولائی کو مسلح افواج سے اظہار یکجہتی کے لئے کراچی کے اسی جناح پارک میں اجتماع منعقد کر رہی ہے اورانشاء اللہ ایم کیوایم کی خواتین کارکنان اور مائیں بہنیں 6جولائی کے اس اجتماع میں بہت بڑی تعداد میں شرکت کرکے نہ صرف اس اجتماع کو تاریخی بنائیں گی بلکہ19، فروری کے اپنے تاریخی اجتماع کا ریکارڈ 6جولائی کو خود توڑ ڈالیں گی ۔جناب الطاف حسین نے خواتین ذمہ دار ان کو ہدایت کی کہ وہ مختلف کمیٹیاں تشکیل دے کر تمام علاقوں میں ماؤں ،بہنوں کو پیغام دیں اور اس اجتماع کی کامیابی کو یقینی بنانے کے لئے بھر پور محنت کریں ۔جناب الطاف حسین نے کہا کہ میں یہ چاہتا ہوں کہ ہم پاکستان کی مسلح افواج کو بتائیں کہ ملک کودہشت گردی سے نجات دلانے کے لئے نہ صرف کراچی کے نوجوان اور بزرگ ان کے شانہ بشانہ ہیں بلکہ مائیں بہنیں بھی پاکستان کو بچانے اور اسے دہشت گردوں سے نجات دلا نے کے لئے مسلح افواج کے شانہ بشانہ ہیں اور ملک و قوم کو جب بھی ضرورت پڑی وہ اپنی خدمات پیش کرنے کے لئے تیارہوں گی ۔اس موقع پر شعبہ خواتین کی ذمہ داران نے جناب الطاف حسین کو یقین دلایا کہ مائیں بہنیں آپ کو مایوس نہیں کریں گی اور 6جولائی کے اجتماع کو کامیاب او ر تاریخی بنانے کے لئے بھر پور محنت کریں گی اور اجتما ع کو تو قع سے بڑھ کر کامیاب بنائیں گی ۔