ایم کیو ایم رابطہ کمیٹی کی سنی تحریک ، نظامِ مصطفی پارٹی اور جمعیت علمائے اسلام (سمیع الحق ) کے رہنماؤں کو پاک افواج کے ساتھ اظہار یکجہتی کیلئے ہونے والے جلسے میں شرکت کی دعوت

کراچی ۔۔۔یکم جولائی2014

متحدہ قومی موومنٹ کے زیر اہتمام پاک افواج کے ساتھ اظہار یکجہتی کے لئے جلسہ عام میں شرکت کے لئے عمائدین شہر اور مذہبی رہنماؤں کو دعوت دینے کا سلسلہ جاری ہے اس سلسلے میں رابطہ کمیٹی کے رکن احمدسلیم صدیقی ، عبدالحسیب اور رکن صوبائی اسمبلی کامران احمد نے سنی تحریک کے رہنماء شاہد غوری اورفہیم قادری، نظامِ مصطفی پارٹی کے سربراہ حاجی حنیف طیّب اور جمعیت علمائے اسلام (سمیع الحق ) کے رہنما اور ممتاز عالم دین مولانااسعد تھانوی سے ملاقات کی ۔اراکین رابطہ کمیٹی نے ایم کیو ایم کے زیر اہتمام پاک افواج کے ساتھ اظہار یکجہتی کے لئے جلسہ عام میں شرکت کی دعوت دی ۔ اس موقع پر رابطہ کمیٹی نے ان سے گفتگو کرتے ہوئے کہاکہ ملک آج جس نازک دور سے گزر رہا ہے اور اس موقع پر ہماری پاک افواج جس جوانمردی سے دہشت گردوں کا مقابلہ کر رہی ہے وہ قابل صد تحسین ہے ۔لہٰذا ایم کیو ایم ایم نے پہلا قدم اٹھاتے ہوئے اس جلسہ عام کا اہتما م کیا ہے ۔ علماء نے ایم کیوایم کے اس اقدام کو سراہتے ہوئے اپنی شرکت کی یقین دھانی کروائی۔