الطاف حسین کی ہدایت پر خدمت خلق فاؤنڈیشن کی جانب سے شمالی وزیر ستان سے نقل مکانی کرنے والے ہم وطنوں کی امداد کے لئے غذائی اجناس اور دیگرامدادی سامان پرمشتمل 2ٹرک روانہ کر دئیے گئے
الطاف حسین نے اپنے کارکنان اور رضاکاران کو دکھی انسانیت کی خدمت اور داد رسی کا درس دیا ہے، ہمارا بھی فرض ہے کہ ہم ملک کے مظلوم و محروم عوام کی بلا امتیاز خدمت کریں ، فاروق ستاراوردیگراراکین رابطہ کمیٹی کی ٹرک روانگی کے موقع پر گفتگو
کراچی ۔۔۔30جون2014ء
متحدہ قومی موومنٹ کے قائد جناب الطاف حسین کی ہدایات پر خدمت خلق فاؤنڈیشن کی جانب سے شمالی وزیرستان سے نقل مکانی کرنیوالے آئی ڈی پیز کی امداد کے لئے کراچی میں خدمت خلق فاؤنڈیشن کے مرکزی دفتر سے غذائی اجناس ، ادویات اوردیگر امدادی سامان پر مشتمل 2ٹرک پیر کے روز روانہ کر دئیے گئے ہیں۔امدادی سامان میں آٹا ، مختلف اقسام کی دالیں ،چاول،شکر،مصالحہ جات،نمک،خشک دودھ،چائے کی پتی، پینے کے صاف پانی اور موزی امراض سے بچاؤ کی ادویات سمیت روز مرہ ضرورت کی دیگر اشیاء شامل ہیں دو نو ں ٹرک ایم کیوا یم رابطہ کمیٹی کے اراکین ڈاکٹر فارق ستار، سید امین الحق ، گلفراز خان خٹک ، کہف الوریٰ اور اراکین اسمبلی نے کو اپنی نگرانی میں روانہ کیا ۔اس موقع پر اراکین رابطہ کمیٹی نے خدمت خلق فاؤنڈیشن کے رضاکاران اور موقع پر موجود ایم کیو ایم کے کارکنان سے گفتگو کرتے ہوئے کہاکہ جناب الطاف حسین نے ہمیشہ بلا امتیاز رنگ ، نسل ، مذہب اور زبان کے ملک کے محروم و مظلوم عوام کی ہر مشکل گھڑی میں امدا دکی ہے اور جناب الطاف حسین نے اپنے کارکنان اور رضاکاران کو بھی دکھی انسانیت کی خدمت اور داد رسی کا درس دیا ہے لہٰذا یہ ہمارا فرض ہے کہ ہم بھی پاکستان کے مظلوم و محروم عوام کی بلا امتیاز خدمت کریں اور اسی لئے آج شمالی وزیرستا ن سے نقل مکانی کرنے والے اپنے ہم وطنوں کے لئے کے کے ایف کی جانب سے امدادی ٹرک بھی روانہ کئے جار ہے ہیں۔