رابطہ کمیٹی کے ڈپٹی کنوینر انجینئر ناصر جمال کا اراکین رابطہ کمیٹی کے ہمراہ قائد اعظم کے مزار سے متصل جناح ؒ پارک کا دورہ

کراچی ۔۔ 29؍ جون 2014ء

ایم کیوایم کی رابطہ کمیٹی کے ڈپٹی کنوینر انجینئر ناصر جمال نے ایم کیو ایم کے زیر اہتمام مورخہ 6جولائی 2014ء بروز اتوار کو افواج پاکستان سے اظہار یکجہتی اور شہیدوں سے عقیدت اور غازیوں سے اظہارِ محبتکیلئے منعقد ہونے والے عظیم الشان جلسہ عام کے سلسلے میں جلسہ گاہ کا دورہ کیا اور انتظامات کا جائزہ لیا ۔ اس موقع پر ان کے ہمراہ رابطہ کمیٹی کے اراکین امین الحق ،عبدالرشید گوڈیل ، خالد سلطان ، اسلم آفریدی ، توصیف خانزادہ ، کراچی تنظیمی کمیٹی کے انچارج واراکین کے علاوہ ایم کیو ایم کے مختلف شعبہ جات کے ذمہ داران و کارکنان بھی بڑی تعداد میں موجود تھے ۔ انجینئر ناصر جمال نے ذمہ دار ان و کارکنان سے گفتگو کرتے ہوئے کہاکہ شمالی وزیرستان میں جاری آپریشن ضرب عضب پوری قوم کی آواز ہے اور اس سلسلے میں قائد تحریک جناب الطاف حسین نے 6جولائی بروز اتوار کو مسلح افواج سے اظہار یکجہتی کیلئے جس تاریخی جلسہ کا اعلان کیا ہے وہ انشاء اللہ تعالیٰ ملک و قوم کو دہشت گردی کے عفریت سے نجات دلانے کیلئے اہم سنگ میل ثابت ہوگا ۔ انہوں عوام سے اپیل کی کہ جناح پارک میں افواج پاکستان سے اظہار یکجہتی کے جلسہ میں زیادہ سے زیادہ تعداد میں شرکت کرکے افواج پاکستان سے تاریخی یکجہتی کا مظاہرہ کریں ۔