کراچی پولیس کی جانب سے ایم کیوایم کے کارکنان کی بلاجوازگرفتاریوں اوررہائی کے لئے بھاری رشوت طلب کرنے پررابطہ کمیٹی کااظہار مذمت

کراچی ۔۔۔26جون2014ء

متحدہ قومی موومنٹ کی رابطہ کمیٹی نے پولیس کی مختلف ٹیموں کی جانب سے ایم کیوایم کے کارکنان کی بلاجوازگرفتاریوں اوررہائی کے لئے لاکھوں روپے رشوت طلب کیے جانے کی سخت ترین الفاظ مذمت کی ہے۔ایک بیان میں رابطہ کمیٹی نے کہاکہ ایسامعلوم ہوتاہے کہ پولیس کے محکمے میں شامل بعض رشوت خورافسران نے شہرمیں جاری ٹارگٹڈآپریشن کوایم کیوایم کے کارکنان کی گرفتاریوں کے ذریعے کمائی کاذریعہ بنالیاہے ۔رابطہ کمیٹی نے کہاکہ جب پولیس افسران خودبے گناہ افرادسے دیدہ دلیری سے رشوت وصول کریں گے تو شہر میں بھتہ خوروں کے خلاف کارروائی کی کامیابی پرایک بڑاسوالیہ نشان لگ جاتاہے۔رابطہ کمیٹی نے وزیراعلیٰ سندھ سیدقائم علی شاہ سے مطالبہ کیاکہ وہ پولیس کے محکمے میں موجود کالی بھیڑوں کے خلاف سخت ترین کارروائی کریں۔رابطہ کمیٹی نے انسانی حقوق کی تنظیموں سے بھی اپیل کی کہ وہ پولیس کے ظلم وستم اورکھلے عام رشوت کی وصولی پرآوازاٹھائیں۔