آل پاکستان مسلم لیگ کے نمائندہ وفد کی خورشید بیگم سیکڑیٹریٹ میں رابطہ کمیٹی کے ارکان سے ملاقات

کراچی ۔۔۔21جون 2014ء

سابق صدر مملکت پرویز مشرف کی جماعت آل پاکستان مسلم لیگ کے نمائندہ وفد نے گزشتہ روزخورشید بیگم سیکڑیٹریٹ عزیز آباد میں متحدہ قومی موومنٹ کی رابطہ کمیٹی کے ارکان، حیدر عباس رضوی اور نثار پہنور سے ملاقات کی اور حق پرست رکن قومی اسمبلی محترمہ طاہرہ آصف کی شہادت پر دلی تعزیت وہمدردی کااظہارکیا۔ اے پی ایم ایل کے وفد نے رابطہ کمیٹی ارکان سے گفتگو کر تے ہوئے کہاکہ ایک خاتون رکن قومی اسمبلی کو دن دہاڑے گولیاں مارکر قتل کرناکھلی سفاکیت اور ظلم ہے اور اس افسوس ناک واقعے کی جتنی بھی مذمت کی جائے وہ کم ہے ۔وفد نے قائد تحریک الطاف حسین ، ایم کیوایم کے کارکنان اور شہید طاہرہ آصف کے سوگوارلواحقین سے دلی تعزیت کااظہارکرتے ہوئے دعا کی کہ اللہ تعالیٰ طاہرہ آصف شہید کو جنت الفردوس میں جگہ عطا فرمائے اور سوگوارلواحقین کو صبرجمیل عطا کرے ۔رابطہ کمیٹی کے ارکان نے آل پاکستان مسلم لیگ (پرویزمشرف) کے وفد کا شکریہ ادا کرتے ہوئے کہاکہ اس سے قبل بھی حق پرست ارکان اسمبلی کو سفاکی سے قتل کیا جاچکا ہے اوراب محترمہ طاہرہ آصف کو لاہور میں باقاعدہ شناخت کرنے کے بعد گولیاں ماردی گئیں ۔انہوں نے کہاکہ قتل وغارتگری کے باوجود ایم کیوایم کے رہنماؤں، منتخب نمائندوں ، ذمہ داروں اورکارکنوں کے حوصلے بلند ہیں ، ہم ہرقسم کی آزمائشوں میں ثابت قدمی رہے ہیں اورانشاء اللہ حق پرستی کی یہ جدوجہد جاری رہے گی ۔