پاکستان عوامی تحریک کے رہنماؤں اورکارکنوں کی بڑے پیمانے پر گرفتاریاں اور ان کے دفاترپرچھاپے کھلی حکومتی بر بریت ہیں ۔الطاف حسین

لندن۔۔۔22 جون 2014 ء

متحدہ قومی موومنٹ کے قائدجناب الطاف حسین نے اسلام آباد،راولپنڈی اور لاہورسمیت پنجاب بھرمیں پاکستان عوامی تحریک کے رہنماؤں اورکارکنوں کی بڑے پیمانے پر گرفتاریوں اورپاکستان عوامی تحریک کے دفاترپرچھاپوں کی شدیدالفاظ میں مذمت کی ہے اوراسے کھلی حکومتی بر بریت قراردیاہے ۔ اپنے ایک بیان میں جناب الطاف حسین نے کہاکہ ہوناتویہ چاہیے تھاکہ حکومت سانحہ 17جون ماڈل ٹاؤن کے ذمہ داروں کوگرفتارکرتی اورلاہورمیں بربریت کرنے والوں کو سزا دی جاتی اس کے بجائے پاکستان عوامی تحریک کے رہنماؤں اورکارکنوں کی ہی اندھادھندگرفتاریاں کی جارہی ہیں اورانہیں حکومتی دہشت گردی کانشانہ بنایا جارہاہے جس کی جتنی بھی مذمت کی جائے کم ہے ۔جناب الطاف حسیننے کہاکہ ایک ایسے وقت میں جبکہ مسلح افواج ملک دشمن دہشت گردوں کے خلاف آپریشن کررہی ہے اور اس جنگ میں اپنی جانیں قربان کررہی ہیں، ایسے وقت میں ملک وقوم کواتحاد ویکجہتی کی ضرورت ہے لیکن حکومت اس نازک وقت میں بھی مخالفین کوریاستی طاقت کے ذریعے کچلنے پر عمل پیراہے جوسمجھ سے بالاترہے۔جناب الطاف حسین نے کہاکہ اپنے رہنماکااستقبال، جلسے جلوس ہرجماعت کاآئینی ، قانونی اورجمہوری حق ہے اورکسی جماعت کواس حق سے محروم کرنااورطاقت کے ذریعے اس کی آوازکودبانانہ صرف غیرجمہوری ہے بلکہ سراسرآمرانہ اقدام ہے جس کی جتنی بھی مذمت کی جائے کم ہے ۔جناب الطاف حسین نے کہاکہ یہ ظلم فی الفور بندکیا جائے ، پاکستان عوامی تحریک کے رہنماؤں اورکارکنوں کورہاکیاجائے اورچھاپوں گرفتاریوں کاسلسلہ بند کیاجائے اوران کی راہ میں رکاوٹیں ڈالنے کاسلسلہ بند کیاجائے۔