ملک دشمن دہشت گردوں کے خلاف بھرپور آپریشن کاحکومتی فیصلہ خوش آئند ہے۔الطاف حسین

لندن ۔۔16جون 2014ء

متحدہ قومی موومنٹ کے قائد جناب الطاف حسین نے کہاہے کہ ملک دشمن دہشت گردوں کے خلاف بھرپورفوجی آپریشن کاحکومتی فیصلہ خوش آئند ہے اور ہم نے ملک کی سلامتی وبقاء ، حساس تنصیبات کے دفاع اورشہریوں کے جان ومال کے تحفظ کی خاطر ہی اس فوجی کے آپریشن کی حمایت کی ہے اور ہم اپنے اصولی مؤقف پر قائم ہیں ۔انہوں نے یہ بات آج سابق وفاقی وزیرداخلہ اورپاکستان پیپلزپارٹی کے مرکزی رہنما سینیٹررحمن ملک سے فون پر گفتگوکرتے ہوئے کہی ۔جناب الطاف حسین نے کہا کہ مسلح افواج نے اپنے مفاد کیلئے نہیں بلکہ پاکستان کو اسکے دشمن دہشت گرد عناصرسے نجات دلانے کیلئے حکومتی فیصلے کے تحت بھرپورآپریشن شروع کیاہے۔انہوں نے پاکستان کے تمام سیاسی ومذہبی رہنماؤں سے بھی کہاکہ یہ و قت مصلحت پسندی کانہیں بلکہ ملک کی بقاء اورسلامتی کیلئے مسلح افواج اوران کے ایکشن کی حمایت کرنے کاہے تاکہ پاکستان کوملک دشمن دہشت گرد عناصرسے پاک کیاجاسکے۔ جناب الطاف حسین نے ایک بار پھر اس بات کودہرایاکہ اب جبکہ مسلح افواج نے دہشت گردوں کے خلاف بھرپورآپریشن شروع کردیاہے توچاروں صوبائی حکومتیں بھی اپنے اپنے صوبوں میں دہشت گردوں کے ممکنہ حملوں سے شہریوں اورتمام اہم مقامات کومحفوظ رکھنے کیلئے بھرپور اقدامات کریں۔رحمن ملک نے طالبان دہشت گردوں کے خلاف جناب الطاف حسین کے واضح اوراصولی مؤقف اورطالبان دہشت گردوں کے خلاف فوج کے آپریشن کی حمایت کو سراہااورکہاکہ تمام سیاسی رہنماؤں اورپوری قوم کواسی جذبہ اورقومی یکجہتی کی ضرورت ہے۔رحمن ملک نے کہاکہ آپریشن کافیصلہ تاخیر سے کیاگیاتاہم دیرآیددرست آید۔ انہوں نے کہاکہ پوری قوم کی دعائیں مسلح افواج کے ساتھ ہیں۔انہوں نے دعا کی کہ اللہ تعالیٰ مسلح افواج کوفتح سے ہمکنارکرے۔

*****