وزیراعظم، پیمرا، آئی ایس آئی، ایم آئی اور مسلح افواج سے اپیل کرتا ہوں کہ وہ بڑے پن کا مظاہرہ کرتے ہوئے جیو کو معاف کردیں۔ الطاف حسین

جیو نے جہاں غلطی کی ہے وہیں جیو اور اس سے وابستہ صحافیوں اور قلمکاروں نے ملک کی بڑی خدمت بھی کی ہے

لندن ۔۔۔11جون2014ء

متحدہ قومی موومنٹ کے قائدجناب الطاف حسین نے وزیراعظم نوازشریف ،پیمرا خصوصاً آئی ایس آئی ، ایم آئی اورمسلح افواج سے اپیل کی کہ وہ جیونیوزکی معافی کوقبول کرلیں اوربڑے پن کامظاہرہ کرتے ہوئے جیوکومعاف کردیں۔ اے پی ایم ایس او کے 36ویں یوم تاسیس کے موقع پر خطاب کرتے ہوئے انہوں نے کہاکہ میں مانتاہوں کہ جیو ٹی وی نے ایک واقعہ کی رپورٹنگ کے دوران قومی سلامتی کے ادارے کے سربراہ کی تصویر دکھا کرغلطی کی، جیونے اس غلطی کی کافی سزابھگت لی ہے۔انہوں نے کہاکہ جیو نے جہاں غلطی کی ہے وہیں جیو اوراس سے وابستہ صحافیوں اورقلمکاروں نے ملک کی بڑی خدمت بھی کی ہے لہٰذامیں جیوسے کہتاہوں کہ وہ اپنی غلطی پر ایک بارپھرمعافی مانگ لیں اورقومی سلامتی کے ادارے بھی بڑے پن کامظاہرہ کرتے ہوئے جیوکومعاف کردیں۔ میں نے بھی اپنی رہائی پر معطل ساتھیوں کومعاف کرنے کااعلان کیاہے۔